नेपाली हास्यव्यङ्ग्य अनलाइन पत्रिका

उस्तै उस्तै लाग्न थालेको छ मलाई पनि
आजकल सिंहदरबार र बधशाला

बधशालाको बाहिरपट्टि भिड हुन्छ
जात जातका रङ् रङका कुकुरहरूको
सबै एक अर्का प्रति आक्रामक हुन्छन्
छुट्याउनै गाह्रो पर्छ यहाँ
को कसको मित्र हो अनि को कसको शत्रु

सबैको एउटै लक्ष्य बधशाला भित्रबाट आउने हड्डीमा
आधिपत्य जमाउनु, एकाधिकार कायम गर्नु
ठिक त्यसैगरि

जसरी हाम्रा परिवर्तनका सपनाहरूको हत्या गरेर
त्यसको हाडखोरमा लुछाचुँडी गरिरहेछन्
तथाकथित हाम्रा नेताहरू

तर बिडम्बना,
हाम्रा आँखाहरू पनि खुलेका छैनन् अझै
जसरी पप्पीहरूका आँखा खुलेका हुँदैनन्
त्यसैले हो गणेश सर,
हजुरलाई जस्तै मलाई पनि
आजकल सिंहदरबार र बधशाला उस्तै उस्तै लाग्न थालेको छ ।

(सिस्नुपानी नेपाल मकवानपुरका निवर्तमान अध्यक्ष स्व.श्री गणेशकुमार पौडेलप्रति समर्पित)