नेपाली हास्यव्यङ्ग्य अनलाइन पत्रिका

म हिंड्न सक्छु
तिम्रा बिरूद्धमा
मेरा खुट्टा भाचिदेऊ

म लेख्न सक्छु
तिम्रा कर्तुतहरू
मेरा औंला काटिदेऊ

म विद्रोहमा चिच्याएर
जुलुस बन्न सक्छु
मेरो जिब्रो थुतिदेऊ

म
चुपचाप चुपचाप सहेर बस्छु
लुछ मलाई
बाँच्नै नसक्ने गरी लुछ

सहनुको विकल्प छैन
म चुपचाप सहन्छु

तिमीले बुझ्नु पर्छ
तिम्रो अन्याय अत्याचारमा
म पिँधिन तयार छु
खरानी हुन मञ्जुर छु
तर आत्महत्या गर्न सक्दिन

तिम्रो अत्याचारको बिरूद्धमा
म उठ्न नसके पनि
मेरो सहनुको पीडाले
एक दिन मान्छे त के
यो धरती फाट्ने छ
यो आकाश च्यतिने छ
हावा पनि रोकिने छ
वहन

सोच
त्यो दिनपछि तिम्रो अवस्था कस्तो होला !

शासनका नाममा
अन्यायको आँधीबेहेरी चलाउनेका
विरूद्ध
अत्याचारको कम्पन ल्याउनेका विरूद्ध
मैले असाध्य पीडा सहेको छु

तिमीमाथिको अन्तिम प्रहारको लागि
म तिम्रा यी सब पीडा खेपिरहेको छु !

आगो बोकेको समय आउनु अघि
तिम्रो सनकको जाँतोमा
अन्न पिसेजस्तो पिस मलाई !

तिम्रा विरूद्ध विद्रोहको महाभूकम्प ल्याउन
तिम्रा यातनाबाट मर्न तयार छु !

काठमाडौं