नेपाली हास्यव्यङ्ग्य अनलाइन पत्रिका

सुन्नु भो ?
यसपाली आफैं उठ्नु हुन्छ रे नेता
अस्ति त उठाउनु पर्थ्यो नि !
दुईचारवटा भुसतिघ्रे जुटाउनु पर्थ्यो नि !
थर् थर् थर् थर् कामिरहनु हुन्थ्यो
कुर्शीमा बस्दा पनि दुईचार जानाले थामिरहनु हुन्थ्यो
उठ्नु मात्रै कहाँ हो र
म आफैं लड्छु पनि पो भन्नुहुन्छ रे
पर्दैन कसैको सहारा
म एक्लै बढ्छु पनि पो भन्नुहुन्छ रे
हो नि!
उहाँ कहाँ हो र एता तेता
मुड्की छातीमा ठोकेर भन्नुहुन्छ
म नेता हुँ नेता ।

फेसबुकमा कतै लेख्छन्
वाह वाह ! कत्रो आँट
अनि कतै कतै लेख्छन्
छ्या अफवाह ऊ हो ढाँट ।

नेता ज्यू ! हजुर नेता बनिरहनु पर्छ
कति मिठो लाग्छ हजुर डाइलग
हरेक चुनाव पिच्छे त्यही भनिरहनु पर्छ
हामी क्या बोर भन्दैनौं नेता ज्यू
हामी हजुरलाई चोर भन्दैनौं नेता ज्यू
भन्दै तेल घस्न तैयार छौँ
वहाँ गद्दामा हामी भुईंमा बस्न तैयार छौं

सुन्नु भो ?
यसपाली आफैं उठ्नुहुन्छ रे नेता ।

०००
गौरादह, झापा