नेपाली हास्यव्यङ्ग्य अनलाइन पत्रिका

लौ केटाकेटी हो खसी आए
कुनै काला आए
कुनै सेता आए
कुनै नम्बर हानेका आए ।

कुनै कान छेडेका आए
कुनै दारी पालेका आए
कुनै दारी फालेका आए
चोक चोकमा आए
टोल टोलमा आए
लौ केटाकेटी हो खसी आए ।

कुनै मुडुला आए
कुनै सिँगाने आए
कुनै गाँडे आए
कुनै साँढे आए
कुनै ट्रकमा चेपिएर आए
कुनै बाइकमा थेचिएर आए
कुनै डिकीमा डामिएर आए
लामकाने आए, मुसाकाने आए
लौ केटाकेटी हो खसी आए ।

कसैले सिङ समाओ
कसैले खुट्टा समाओ
कानमा समाएर भ्या बनाओ
पुच्छरमा समाएर प्या बनाओ
लौ केटाकेटी हो चोकमा आओ
खसीसँगै रमाओ
म्याँ गर्दै भ्या गर्दै
लौ केटाकेटी हो खसी आए ।

कुनै रोगाएर कुनै भोकाएर
शहरका गल्ली गल्लीमा आए
कुनै पर्वमा पग्रेल्न लगिए
कुनै चुनावमा चाख्न लगिए
सुकुटी बनाएर चपाउन लगिए
जे जसरी भए पनि अघाउन लगिए
सबैले एक एक ओटा दाम्लो समाओ
लौ केटाकेटी हो चाँडो आओ ।

०००
ओखलढुङ्गा
सम्पर्क : ९८४३०५४१६१