प्रकाश चापागाइँलय ताल फेर्न
जो बाँसुरीको धुन मेट्न खोज्छ ट्याम्को र ढ्याङ्ग्रोसित भेट्न खोज्छ यो देशका ती गलगाँड चिन्दै यात्रा नयाँ गर्नुछ एक बन्दै ।
खै बाँसुरीको धुन खै हरायो
गाई कहाँ सुन्नु गधा करायो
सम्मोहनी कोकिल कण्ठ छैन
ट्याम्को बजेको छ सितार हैन
छैनन् उज्याला अनुहार हार
खोक्रो भयो कान्ति उड्यो मुहार
डुङ्गा छ खै नाविक देखिएन
खोजेर हिँड्दा पनि भेटिएन
बन्ने भए भाषणबाट देश
बन्ने थियो सुन्दर राष्ट्र एक
ढाँटेर झुक्याउनुमा छ गर्व
त्यो गर्वनै बन्छ विशेष पर्व
उल्टा परे अक्षर चिन्न गाह्रो
सुल्टिन्न उल्टो अनि विन्न गाह्रो
साँचो कुरा बोल्न झनै छ गाह्रो
तेर्सिन्छ सोझै मनमा तगारो
हाँसेर हिँड्ने परिवेश छैन
रोएर के हिँड्नु सुहाउँदैन
तोड्नू छ यो जञ्जिर दासताको
आभा छरूँ स्वच्छ सफा उषाको
जो बाँसुरीको धुन मेट्न खोज्छ
ट्याम्को र ढ्याङ्ग्रोसित भेट्न खोज्छ
यो देशका ती गलगाँड चिन्दै
यात्रा नयाँ गर्नुछ एक बन्दै
आऊ सबै एक बनेर आऊ
नौलो नयाँ जोश भिरेर आऊ
यो देशको सुन्दर रूप हेर्न
थुप्रै छ बाँकी लय ताल फेर्न ।
०००
चितवन
