नेपाली हास्यव्यङ्ग्य अनलाइन पत्रिका

यो माटोसित प्रेम छैन जसको माटो पुजारी उही
यै माटोसित प्रेम गर्छ जसले बस्छन् सधैँ खुम्चिई
यो कस्तो परिवेशमा रुमलियौँ चल्दैछ कस्तो रित
के को साइनु लाउँने र घरकै खम्बा उखेल्नेसित

बाटो खोज्छ विनास गर्न घरको टेकेर गोडा यहीँ
बाटो रोज्दछ जालको र भ्रमको नाङ्गै भुतुङ्गै बनी
जो जो छन् मतियार यार यिनका सञ्जालमा आश्रित
के को साइनु लाउने र घरकै खम्बा उखेल्नेसित

यौटा वानर झैँ छ छैन गतिलो अर्को अरिङ्गाल झैँ
यौटा गोमन सर्प झैँ छ खतरा अर्को उता स्याल झैँ
जो हेरे पनि ध्वस्त पार्न घरनै देखिन्छ उत्तेजित
के को साइनु लाउने र घरकै खम्बा उखेल्नेसित

खल्ती भित्र छुरा लिएर मुखले संवृध्दिको चाहना
आफ्नैँ देश निशेष पार्न यिनको चल्दैछ वार्ता घना
हामी मुर्ख बनेर फेरि यिनकै विश्वासमा वन्दित
के को साइनु लाउँने र घरकै खम्बा उखेल्नेसित

यौटा भन्दछ देश सुम्पनु पर्यो जिम्मा मलाई दिनू
अर्कोले हक खोज्छ लौ त म बिना बेचेर देखाउनू
तानातान छ देश बेच्न यिनमा हुन्नन् यिनी दण्डित
के को साइनु लाउँने र घरकै खम्बा उखेल्नेसित

यस्ताकै तजवीजमा मुलुक यो जिम्मा दिने हो भने
यस्तैले अझ देश हाँक्दछु भनी जिम्मा लिने हो भने
मान्छे हो भन बाँच्दछौ र कसरी खै ज्यानको निश्चित
मेरो साइनु आजबाट सकियो खम्बा उखेल्नेसित ।

चितवन