नेपाली हास्यव्यङ्ग्य अनलाइन पत्रिका

लक्ष्मी तपाईंकोमा आउँनुभएछ
मज्जाले पूजा गर्न पाउँनुभएछ
बधाई छ हजुर !

हाम्रोतिर त हेर्नुभएन
आउँनोस भन्दा टेर्नुभएन
मोमबत्ती बालियो
ताईमा बाबर हालियो
ऋतु जनाइयो
तिहार मनाइयो
यस्तै छ है हजुर !

लक्ष्मीलाई पनि सान र सौकत नै चाहिंदोरहेछ
लक्ष्मी बोलाउँन पनि औकात नै चाहिंदोरहेछ
हजुरहरुकोतिर अल्मलिएपछि
हजुरहरुकै महानताले
हाम्रो झुप्रो छलिएपछि
कहाँ हामीलाई देख्नु र
कहाँ यस्तो धूलौटोमा वहाँले टेक्नु र
हजुरले नै अनेक थोक सजाउँनुभएछ
लक्ष्मी तपाईंकोमा आउँनुभएछ
मज्जाले पूजा गर्न पाउँनुभएछ
बधाई छ हजुर !

हो हजुर !
हजुर हाकिम हामी कारिन्दा
हजुर नेता हामी जनता
उता पनि गइएन हजुर !
यताको पनि भइएन हजुर !
माटोले टालेको दराजको खापाबाट मुसो पसेपछि
बिहेमा सिलाएको कोटको गोजीमा
माकुरो बसेपछि
अर्काले टेर्दैनन् हजुर !
आफ्नाले पनि हेर्दैनन् हजुर !

हजुरसंग कार छ
आफ्ना मात्रै होइन अर्काका लक्ष्मी पनि घुमाउँनुहुन्छ
बेइमानीको गिटार बजाएर
इमान्दारिताको गीत गाउँनुहुन्छ
त्यसैले
लक्ष्मी त्यतै आउँनुभएछ
मज्जाले पूजा गर्न पाउँनुभएछ
बधाई छ हजुर !

०००
गौरादह, झापा