नेपाली हास्यव्यङ्ग्य अनलाइन पत्रिका

गधालाई नुहाएर गाई हुँदैहुन्न
जति सफा गरे पनि गन्हाउँछ डुङ्ङ ।

जल्ले दिन्छ मोटो मुठो, कुरा हावादारी
उसैको छ विजयको पक्का पल्ला भारी ।
जितेपछि बिर्से सबै बाचा जेजे थिए
चुनाबको खर्चभन्दा लाखौँ बढी लिए ।

किचेका छन् जनताका इच्छा चोखा थिए
मिचेका छन् मन-माला सुनौला जो थिए ।
जुधाएर साँढेलाई बाच्छा-बाच्छी मिचे
सुकाएर गाईलाई सुकुटी झैँ थिचे ।

डाँफे चरी चपाएर, कुम्ल्याएर रमे
जनताका पीरमर्का ओछ्याएर जमे ।
कल्ले सक्ने हल्लाउन लिसो जमेपछि ?
भुँडीभित्र हुलेपछि कल्ले भेट्ने दसी ?

सकिँदैन साँढेलाई खसी बनाउन
छाडा छोडेपछि उही थाल्छ गन्हाउन ।
साढेँभन्दा बोको ठूलो हुन थालेपछि
सीधासादा जनता झन् पर्न थाले खसी ।

च्याँखे थाप्नेहरू भन्छन् पाँचै ठाडा परोस्
कौडा हान्नेहरू भन्छन् चौका मात्रै झरोस् ।
बजेटको हल्लाखल्ला मच्चिएको मौका
छोपीकन छाडिदिए पाँचै ठाडा, चौका ।

०००
नागार्जुन न.पा.-१, रानीवन, काठमाडौँ
९८४१४९१०८१