नेपाली हास्यव्यङ्ग्य अनलाइन पत्रिका

१.शुभकामना

मेरा मित्रको व्यवहारदेखि वाक्कदिक्क भएर मलाई पैतालादेखि रिस उठिरहेको थियो । त्यहीबेला उसले मलाई मोबाईलमा एस.एम.एस. गर्यो । लेखिएको थियो- विजया दशमीको सुखद उपलक्ष्यमा सम्पूणर् परिवारजनमा हार्दिक मंगलमय शुभकामना व्यक्त गर्दछु ।

मोवाईलमा त्यो सन्देश देख्ने बित्तिकै मेरो दिमागमा उसले गरेको व्यवहार चलचित्रको रिल घुमे झैं घुम्यो । त्यसको प्रत्युत्तर यति छिटो आयो कि मैले यस्तो लेखें- विजया दशमीको उपलक्ष्यमा तँलाई १८००० हजारको शुभकामना दिएँ है ! उसले खुशी हुँदै मलाई म्यासेजमा लेख्यो- त्यत्रो त्यत्रो हजारको शुभकामना ! सबै मलाई दिएर अरूलाई के दिन्छस् नि !

मैले ठट्टा गर्दै त्यत्रो रकमको शुभकामना उसलाई दिनुको कारण पैसा फिर्ता पाउने आश मरेर हो ।

२.नातामा मुद्दा

दिलरत्नको सम्पत्तिको विषयमा धर्मपुत्रका रूपमा पालेका भाइ र छोरीहरू बीच मुद्दा चल्यो । त्यसबेला दुबै पक्ष हार्ने पक्षमा देखिएनन् । दुबैले तिकडम, जालझेल लगायतका विभिन्न खेलहरू खेले । अन्तिममा भाइ हिरारत्नले मुद्दा जित्यो । त्यतिन्जेलसम्ममा हिरारत्नको घर र घरले आर्जेको जग्गा बाहेक अरू सम्पत्ति सबै स्वाहा भैसकेको थियो ।

हिरारत्नको पक्षमा वहस गर्ने वकिलको घर भने उता दरबार बन्दै थियो ।

३.बिहेको रचना

मेरो कोठामा किताब, सिर्जनाका रचनाहरू, अन्य कागजपत्रले भरिएको छ । राति खस्र्याक खुर्सुक गरेको आवाजले मेरो निन्द्रा भङ्ग भयो । उठेँ, बत्ती बालेर हेर्दा त कागजपत्रहरू सव छरपस्ट अवस्थामा थिए । आज राति मुसा आएर यसो गरेछ भन्ने सम्झेँ । त्यहाँको अवस्था देखेर मनमा शंका लाग्यो । अनि कोठामा छापा मार्न थालेँ । दराजको पछाडिपट्टि बिहे दर्ता शीर्षकको एउटा हास्यव्यङ्ग्य पो भेटेँ ।

मुसाले लिएर जाँदा पनि बिहेकै रचना लगेको देखेर मलाई औधी हाँसो लाग्यो ।

०००
चाबहिल, सरस्वतीनगर