नेपाली हास्यव्यङ्ग्य अनलाइन पत्रिका

उहाँ आउनु भो
मलाई काममा सघाउनु भो
घरि जाँतो घुमाउनु भो
घरि ढिकी उचाल्नु भो
भनेको सबै मानेर
मेरा झिँगा धपाउनु भो
कति मीठो बोलेको
हृदय सबै खोलेको
सिस्नोजस्तो नपोल्ने
बढी केही नबोल्ने
बोले पनि बिर्सने
विकास सबै गर्ने रे !
काममा आफैं खट्ने रे !
बहुमत दिनु पर्ने रे
संसद विघटन नगर्ने रे
हिजो तर मार्न नपाउँदा
पेट अघाउँदै अघाएन रे !
डकार आउन छोड्यो रे !
कब्जियतले गाल्यो रे !
उहाँ आफै रोगी रे !
अहिले हारे जोगी रे !
देश विकास गर्ने भा
डाँडाको टावर चढ्ने भा
एक पटक भोट हाल्न
अवस्य जानू रे !
भत्ता सबै खानु रे !
रोग आउँदै आउँदैन
विदेश जानु पर्दैन
गए पनि फर्कनु
मँहगीदेखि नतर्सनु
उहाँले भाषण गरेको
म सुन्ने परेको
विश्वास धेरै गर्नुछ
उहाँकै शरण पर्नुछ
घोषणापत्र कोरेको
हैन झुट्टो बोलेको
संसदमा अब नसुत्ने
नारा लाउँदै भत्ता नबुझ्ने
भागेर रोस्ट्रममा पुग्नु पर्दैन
गल्तीमा माफी माग्ने रे !
कमिसनको पैसा छाद्ने रे !
उहाँ आएर रुनु भो
मलाई भोट दिउँ दिउँ भो ।

०००
ओखलढुङ्गा