नेपाली हास्यव्यङ्ग्य अनलाइन पत्रिका

हँसिया र हलो हथौड़ा घन तारा
एकैभान्सामा छन् मालिक सर्वहारा
को हो वर्गसत्रु को हो मित्र घाती
कुहिरोको काग झै बनेका छन् साथी ।

पाक्दैछ खिचडी को होला भान्से
फरक छैन हुलिया उस्तै छन् मान्छे
सिद्धान्त आस्था कुर्सीमा टाँसेर
हिंड्छन् स्वार्थीनेता निर्लज्ज हाँसेर ।

भोका र नाङ्गाको कहाँ छ र सत्ता
सबै नेता ढोंगी सबै छन् मईमत्ता
चुनाव हात्तीको देखाउँने दाँत हो
सत्ताको उन्माद मदारीको मात हो ।

हिउँदको सिरेटोले गरीब नै डाम्छ
भोको छ पेट हातखुट्टा काम्छ
न जग्गा जमिन न छ रोजगारी
विसंगत प्रवृत्ति निरन्तर छ जारी ।

जिन्दावाद भनूँ कि मुर्दावाद भनूँ
कि तिम्रा पाप र अपराध गनूँ
समय हो नदी कहाँ फर्कन्छ
असल कर्म गर्न किन पो तर्कन्छ ।

समाजवादको करेसामा साम्यवादी साँढे
ढुकिबस्छ छेउमा कतै पुँजीवादी ढाडे
गरीबको भोकोपेट वादले भरिन्छ र
खोलावारि खुट्टा कमाई जँघार तरिन्छ र ?

०००
दमक, झापा