नेपाली हास्यव्यङ्ग्य अनलाइन पत्रिका

चुनाव आयो, मंसिर ४ गते मैले जित्नुपर्छ । मेरो पनि राजनीतिक दर्शन छ । आफ्नै पार्टी छ । मेरा पार्टीको म संस्थापक । अध्यक्ष म नै हुँ । महासचिव मै हुँ । सचिव, उपाध्यक्ष, कोषाध्यक्ष, कार्यसमिति सदस्य, डन, लठैत, उम्मेद्वार, कार्यकर्ता, सहयोगी, शुभचिन्तक, प्रचारक, मतदाता पनि मेरा पार्टीको मै हुँ । म स्वतन्त्र उम्मेद्वार होइनँ । नजन्मिँदा के थिएँ, थाहा छैन । जन्मिएपछि म स्वतन्त्र भइनँ, चाहेर पनि स्वतन्त्र हुन सकिनँ । अरू सबैले स्वतन्त्रता दिए पनि आमाबाले जन्माई हुर्काई गरेको ऋण छ, मैले आफ्नै जिउ पाल्दा लागेको ऋण छ, राष्ट्रको ऋण छ । यस्तै ऋणले स्वतन्त्रता दिएन ।

स्वतन्त्र नभएकै पिरले त म चुनाव लड्दै छु । एक दिन मात्रै होइन, म दिनदिनै लड्दै छु, छिनछिनै लड्दै छु । मेरो पार्टीको घोषणापत्रमा कसैलाई धुलो चटाउने एजेन्डा छैन । कसैको पत्ता साफ गर्ने कुरा छैन, कसैको नामो निसान मेटाउने लक्ष्य छैन, कसैको कन्तबिजोक पार्ने दमदार अभिव्यक्ति छैन, कसैलाई खुइल्याउने प्रसङ्ग छैन र कसैमा छिर्के हाल्ने चाल नै छैन ।

राजनीतिमा चाहिने कुरा केही छैन भने किन चुनाव लडेको त भनेर खोचे थाप्नुहोला, त्यसमा तपाईंलाई छुट छ । त्यसको उत्तर खोज्ने भए दिन्छु । मैले ढाँट्नु हुँदैन । पर्खेर यसपछिको निबन्ध पढ्नुहोला ।

०००
कपन, काठमाडौं