नेपाली हास्यव्यङ्ग्य अनलाइन पत्रिका

भन्छन् बूढापाकाहरू-
“भुक्ने कुकुरले टोक्दैन ।
टोक्ने कुकुरले भुक्दैन ।”
त्यसैले जनता जनार्दनहरू अब झुक्दैनन् ।

वाटामा बाँस तेर्साएर हुन्छ,
नीति र नैतिकता त्यस्तै हो,
विकासको गोटी यसरी नै चालौं ।
वा वाटामा गाह्रो लगाएर हुन्छ,
नेता तर्साउन चुक्दैनन् ।
कुकुर चिन्हमा भोट हालौँ ।

भन्छन् बाबुबाजेहरू-
“जुन जोगी आए’नि कानै चिरिएका ।”
यहाँ त जोगीका कुरा होइन,
भोगीहरूका मति चिरिएको ।
योगीहरूका गति चिरिएको ।
नेता त सबै नेता नै भए,
नेताका गोत्रमा कुकुर गए ।
सत्ताका लागि नेता भिड्ने,
हड्डीका लागि कुकुर भिड्ने ।
राष्ट्र र राष्ट्रियता यस्तै हो,
कमाउन सबैलाई पर्ने भो ।
खल्ती-खल्तीमा नोट हालौं ।
कुकुर चिन्हमा भोट हालौं ।

भन्छन् बूढापाकाहरू-
“बाह्र वर्ष ढुङ्ग्रामा हाले पनि
कुकुरको पुच्छर बाङ्गाको वाङ्गै ।”
सायद यस्तै भएर होला !
नेताहरू त्यस्तै बाङ्गा छन् ।
सोझिन कहिल्यै जानेका छैनन् ।
सोझिन कहिल्यै मानेका छैनन् ।
चिची र पापामै जुटेका छन् ।
सत्ता र सोहर्नको मातमा आज
जनतालाई नै धुतेका छन् ।
नेता आखिर नेता नै हो,
नेताहरूको स्वागत थालौं ।
धनजनको सुरक्षा हुन्छ,
कुकुर चिन्हमा भोट हालौँ ।

गिठ्ठा भ्याकुर खानेहरू
पुलाउ कवाफ खाने भए ।
नाङ्गा खुट्टा हिँड्नेहरू
पजेरामा सललल जाने भए ।
प्रजातन्त्रका हिमायतीहरू
प्रजाकै पेट मार्ने भए ।
राष्ट्रियताका रखवालाहरू
राष्ट्र नै लिलामीमा पार्ने भए ।
मालिकका अगाडि दुम हल्लाउने
देश विकास त त्यस्तै हो ।
आज खोलाखोलै गए ।

नेता सारा पुच्छर भए ।
नेपालीको आत्मसम्मान,
पेट-पेटको विकास थालौं ।
ता वफादार नोकर हुन्
कुकुर चिन्हमा भोट हालौं ।

०००
‘यमराजको निम्तो’ बाट