नेपाली हास्यव्यङ्ग्य अनलाइन पत्रिका

पोखराको तेर्सापट्टीमा २००६ सालको माघ १ गते सिद्धिरत्न शाक्य र माता सेतुली शाक्यका सुपुत्र नेत्ररत्न शाक्य नै वर्तमान नेपाली हास्यव्यङ्ग्य लेखनमा सक्रिय विश्व शाक्य हुनुहुन्छ । २०२२ सालतिर हाइस्कुले विद्यार्थी छँदा लेखिएको ‘सात्रक गोडा फाट’ कविताबाट नै उहाँको हास्यव्यङ्ग्य लेखन आरम्भ भएको हो । शाक्यको पहिलो हास्यव्यङ्ग्य कृति भने ‘कृष्ण उवाच’ (२०३८) हो । शाक्यका प्रकाशित हास्यव्यङ्ग्य कृतिहरूमा ‘पुड्के मान्छेका पुड्का कविताहरू’ (२०५०), ‘कस्तो गधा रहेछ’ (२०५१), ‘यमराजको निम्तो’ (२०५४, ‘श्री पशुमहापुराण’ (२०५७), ‘विकासे च्याङ्ग्रो’ (२०५९), ‘ठेट्नै ठेट्ना’ (२०६१), ‘मिस्टर माेमाे’ (२०६५), ‘फुट्या आँखा’ (२०७०), ‘साेझा तस्विर बाउँटा कुरा’ (२०७१) रहेका छन् । २०६२ सालकाे भैरव पुरस्कार प्राप्त शाक्यका ४ दर्जन भन्दा बढी हास्यव्यङ्ग्य रचना फित्काैली डटकममा प्रविष्ट भएका छन् ।