मान्छे आफै लिलाममा
उधौली उभौली पूर्णिमा संक्रान्ति तिज र औंसी दान र दक्षिणा भएर आइ रहोस् चुनाव लागि रहोस् चुनावी हाटबजार लिलाममा आफै चढ्न, मान्छे !
आफ्नो मोल आफै तोकेर
केही थान थप मान्छेको नाम बोकेर
आफ्नो मोल होलसेलमै मोलेर
बिक्रीमा मान्छे आफै चढेर
लिलामा छ सेकेण्ड सेकेण्ड गनेर ।
समय सिमा तोकेर
तमसुक कोरेर
साक्षी ल्याप्चे ठोकेर
मतको नाममा
चुनावको काममा
बोका खसी भन्दा सस्तो
तौलिन नपर्ने थोक मूल्यमा
चुनावी बजारमा मान्छे बिक्रीमा !
अकरो छैन मान्छे
आफै मूल्य तोकेर सस्तैमा ग्राहक खोज्दै
टिनिनी फोनको घण्टी बजाउदै
फरक फरक पार्टी र नेतासँग
अलकति थोरै माथिल्लो सौदावाजी गर्दै
लामबद्ध मान्छे लिलाममा चढ्दै ।
देश, समाज र राष्ट्र
स्वाभिमान अखण्डता र राष्ट्रियता
भन्ने कुरा न हुन्
सुन्ने कुरा न हुन्
गणतन्त्र, प्रजातन्त्र
खेल्ने कुरा न हुन्
जान्ने कुरा त द्रव्य हो, द्रव्य !
चुनाव आवस् आइ रहोस्
चुनाव रकमरूपी चाड होस्
पाँच वर्ष किन ?
वर्षवर्षै आवस्
दशैं बनेर
तिहार भनेर
उधौली उभौली
पूर्णिमा संक्रान्ति
तिज र औंसी
दान र दक्षिणा भएर
आइ रहोस् चुनाव
लागि रहोस् चुनावी हाटबजार
लिलाममा आफै चढ्न, मान्छे !
०००
कैलाली, हाल काठमाडौ