अन्जु शर्माप्रिय ! तिमीलाई पनि म चिठी पठाउँछु…
प्रिय ! स्वर्गबाट बाले पनि चिठी पठाउनु भाछ- ठूले ! धेरै दुःख नगर छोरा जति दुःख गरेर भए नि मैले तेरै लागि घडेरी जोडिदिएको छु झट्टै आएस् घर बनाएर बस्नु छ ।
सुन प्रिय !
आज मेरा धेरै चिठी आएछन्
साउदीको मजराबाट
छोराले चिठी पठाएछ-
खजुरको रूखमा घाँस काट्न जाँदा
भाँचिएको खुट्टा लिएर आउँदैछ रे !
सुन्दैछ्यौ के प्रिय !
कुवेतको बंगलाबाट
छोेरीको पनि चिठी आएछ-
मालिकका पाहुनालाई
सन्तुष्टि दिँदा दोजिया भइछ
त्यसैले न्वारान गर्ने बाबुको खोजीमा
सायद छिट्टै नै नेपाल आउदैछे रे !
अँ, प्रिय !
गतसाल मुम्बईको कोठीमा बेचिएकी
सान्नानीको पनि चिठी आएछ-
असुरक्षित यौनसम्पर्कका कारण
एच.आइ.भी. पो लागेको छ रे
त्यसैले कोठी मालिकले
छिट्टै नेपाल पठाउँदै छ रे !
प्रिय !
स्वर्गबाट बाले पनि
चिठी पठाउनु भाछ-
ठूले ! धेरै दुःख नगर छोरा
जति दुःख गरेर भए नि मैले
तेरै लागि घडेरी जोडिदिएको छु
झट्टै आएस् घर बनाएर बस्नु छ ।
मेरी प्रिय !
थाहा छ तिमी र म छुट्टिनुहुन्न
तिमीसँग मेरा धेरै कथा जोडिएका छन्
त्यसैले घर बनाउने बित्तिकै
तिमीलाई पनि म चिठी पठाउँछु ।
०००
रातोपुल, काठमाडौं
Most relevant events