नेपाली हास्यव्यङ्ग्य अनलाइन पत्रिका

मन्दिर फेरिएको होइन
मन फेरिएको हो
देउता फेरिएका हुन्
मूर्ति फेरिएका हुन्
मूर्ति धातुका हुन्
ढुङ्गा, माटो र काठका हुन् ।

मूर्ति निर्जीव हुन्
आकार परिवर्तन गर्न सकिन्छ
स्थानान्तरण गर्न सकिन्छ
आफै प्राण कहाँ हुन् र मूर्ति ?
प्राण प्रतिष्ठा गर्नुपर्छ
प्राण भर्न सकिन्छ ।

नाम फेर्न आइतवार लाग्दैन
त्यत्तिसकोटी भित्र जे राखे पनि हुन्छ
माटो सुहाउँदो
ठाउँ सुहाउदो
परिस्थिति मेल खाने
भक्तहरूलाई सजिलो लाग्ने ।

पुजारीहरू मिले जे गरे पनि हुन्छ
काठ, ढुङ्गा धातु जे पुजे पनि हुन्छ
पुजारीहरूले धामिलाई झाँक्री
झाँक्रीलाई धामी बनाइ दिन्छन्
वन देउतालाई घर देउता
घर देउतालाई वन देउता बनाउन
सिपालु हुन्छन् पुजारी ।

पुजारी पाँच रूपैयालाई गाई बनाई दिन्छन्
एक सुक्कालाई गोवर मान्छन्
एक सिक्कालाई गहुत मान्छन्
एक चिम्टी गोबरले सारा ब्रह्माण्ड पोत्न सक्छन्
एक थोपा गहुँतले आकाश पाताल शुद्ध पार्न सक्छन् ।

फूलपातेले ताली बजाई हाल्छन्
भक्तहरूको लाइन मिलाई हाल्छन्
भक्तहरू विश्वासिला हुन्छन्
पुजारीले भनेपछि मान्छेकालाई गाईकै हो मान्छन् ।

०००
कैलाली, हाल काठमाडौं