नेपाली हास्यव्यङ्ग्य अनलाइन पत्रिका

हाम्रा बा !
दिनभरी हलो चलाउनु हुन्छ !
टालेको कछाड र भोटोमा रमाउनु हुन्छ !
छोरा छोरीको स्कुलको फिस तिर्न,
चाँडवाड मनाउन,
ऋण काँड़्नु हुन्छ !

तर तिम्रा बा !
दिनभरी सुशासनको भाषण छाँट्नु हुन्छ !
रातभरी माफिया र तस्करहरूसँग सेटिङ मिलाउनु हुन्छ !
साँझमा अबैध सुन र पैसा,
घर भित्र्याउनु हुन्छ !

हाम्रा बा !
गैह्री खेत स्कुललाई दान दिएर,
पुण्य कमाउनु हुन्छ !
मुठी दान उठाएर अस्पताल बनाउनु हुन्छ !
इमान, जमानको कुरा गर्नु हुन्छ !
बोलीको पक्का हुनुहुन्छ !

तर तिम्रा बा !
सरकारी जग्गा लुटेर खान,
खप्पिस हुनुहुन्छ !
कालो धनलाई सेतो बनाउन सिपालु हुनुहुन्छ !
सरकारी अनुदानमा शिक्षा र स्वाथ्यको व्यापार चलाउनु हुन्छ !
फरेवी,जाली हुनुहुन्छ !

हाम्रा बा !
नियत को सफा हुनुहुन्छ !
दासत्व बिरोधी हुनुहुन्छ !
परिश्रमको पारखी हुन्छ !

तर तिम्रा बा !
कोखमा दाह्रा पाल्नुहुन्छ !
मिठो बोलेर आफन्तको छातीमा,
छुरी चलाउनु हुन्छ !
दासहरूको झुण्डमा रमाउनु हुन्छ !
जनताको भाग खोसेर आफ्नो भकारी
भर्नुहुन्छ !

यथार्थमा !!!
मेरो बा !
इमानको रोटी खानुहुन्छ !
घर चलाउनु हुन्छ !
तर, तिम्रो बा !
लुटको रोटी खानु हुन्छ !
शासनको आसनमा बस्नु हुन्छ !
देश चलाउनु हुन्छ !

०००
गोरखा