नेपाली हास्यव्यङ्ग्य अनलाइन पत्रिका

कसरी दिउ श्रद्धाञ्जली
कसरी भनौ समवेदना
श्रद्धाञ्जली लेख्न श्रद्धा हुनुपर्छ
समवेदना भन्न समान वेदना हुनुपर्छ ।

यहाँ बाँचेको त को छ र ?
मर्नेहरू लामबद्ध छन्
स्वदेशमा छन्
विदेशमा छन्
आकाशमा मर्छन्
धर्तिमा मर्छन्
गाडीका चक्का चिप्लिएर मर्छन्
जहाजका पखेटा खुस्किएर मर्छन् ।

बलात्कृत भएर मर्छन्
बलात्कारको आरोपमा मर्छन्
अस्पताल नभएर मर्छन्
ओखती नपाएर मर्छन्
स्वास्थ्य शुल्क तिर्न नसकेर मर्छन्
दुर्घटनामा फ्याट्ट मर्छन्
न्यायमा गिजोली गिजोली तीन पुस्ता मर्छन्
बाजे, छोरा र नातिहरू मर्छन् ।

अन्यायमा मर्ने त कति कति ?
बिचौलीयाले भाग्य देखाएर मार्छ
दलालले भाग्य लेखाएर मार्छ
बैंकले ब्याज लगाएर मार्छ
सहकारीले पैसा भगाएर मार्छ
लघुवित्तले जग्गामा कब्जा जमाएर मार्छ ।

पानी नपाएर मर्छन्
मल नल्याएर मर्छन्
बिऊ नभएर मर्छन्
औजार नबनाएर मर्छन् ।

व्यापारीले धानको मोल नदिएर मार्छ
कारखानाले उखु उधारो लिएर मार्छ
गरिबीले नदीमा हाम फाल्न लगाएर मार्छ
समाजले झुण्डिन लगाएर मार्छ
सरकारले हस्ताक्षर गराएर मार्छ ।
भावपूर्ण श्रद्धाञ्जली मृत्यु वरण गर्नेहरूलाई
समवेदना शोकमा छट्पटाएका आफन्तहरूलाई ।

०००
कैलाली, हाल काठमाडौं