नेपाली हास्यव्यङ्ग्य अनलाइन पत्रिका

हिजोआज खबरकागत. टिभी च्यानेल वा अनलाइन न्यूज हेर्नु पटक्कै मन लाग्दैन । हत्या, बलात्कार, घाँटीमा पासो, विषपान तथा सौता ल्याएका खबर देख्दा मनै पिरोलिन्छ । यस विषयमा कसैसित चर्चा गर्नु पनि मन नलागेको बेलामा मेरा पिउनले मलाई प्रश्न गरे- म्याडम ! हाम्रो देश साँच्चै भताभुङ्गै भएछ हो’कि’ !

मैले तुरुन्तै जवाब दिएँ – जान्दिनँ ।

उनी बोल्दै गए- होइन म्याडम ! कस्तो अचम्म र उदेक…हिजो राती फुटबल मैदानमा एउटी युवतीलाई साह्रै नराम्रो पाराले हत्या गरेछ ।

रात विरातमा फुटबल मैदानमा गएर आफ्नो काल आफै खोज्नेलाई मेरो भन्नु केही छैन – मेरो जवाब ।

अच्छा म्याडम ! नाता-नातिनीका धनी भइसकेँ म । नोकरी पाकेको बालीजस्तै भइसकेको छ । यो संसारमा घोप्टो-चेप्टो-नेप्टो, ङालाक-ङिलिक परेर गोता लाइसकेको छु । आँ गर्दा अलङ्कार बुझ्छु । कुन धानमा कति चामल छ सो खुट्याउन फरक पर्दैन तर एउटै कुरा बुझ्न सकेको छैन, एकजना युवकलाई ज्यूँदै जलाएर मारेपछि अपहरणको दोष लाइन्छ । बेला-बखत मानिसहरू हराउने (लापत्ता) गर्छन् । त्यसपछि जलिसकेको कङ्काल आफन्तका हातमा सुम्पेर जलाउने आदेश दिइन्छ । जति थाँती रहेको छ कम्पिलिट गरिदिने आदेश ।

मैले भनेँ- त्यो केही पनि होइन… रङ् पोलिटिक्स गर्‍यो भने यस्तै हुन्छ । औरङ्गजेबले आफ्नै भाइको टाउको छिनाएर टेबलमाथि सुनको थालमा सजाएर राखेका थिए भन्ने तिमीलाई थाहा छैन ? आफ्नै बूढ़ा पितालाई साङ्लोले बाँधेर राखेका थिए भन्ने इतिहासमा पढ़ेनौ ? सिंहासन भनेको चाहिँ सिंहको आसन हो । त्यस्तो आसनमा कुकुर बसेर भौं-भौं गर्दा पब्लिक हाँस्नै हुन् । राजत्वको प्रेष्टिज गार्लाम-गुर्लुम हुन्छ । राजनीति भनेको साँप हातमा लिएर खेल्नु हो । हिम्मत, आँट, बल-बुता चाहिन्छ राजनीतिमा ।

कारगिल ?

गोर्खाहरूलाई मास्नु एलाउड छ । मच्छड़्, झिङा मासे जेल हुन्छ ।

म्याडम सानो मुख ठूलो कुरा गरेजस्तै हुन्छ । यो कारगिल, टाइगर हिल, सियाचीन उँभो-उँभोका सिमानाहरूतिर गोर्खा पल्टन छैन भने आतङ्कवादीहरूले तिम्रो मेरो देशलाई सखाप पार्छ भन्छ नि ।

तिमीले ठिकै भन्यौ । आतङ्कवादीसित लड़ाइँ गर्ने बेलामा हाम्राहरूलाई फ्रण्टमा पठाउँछ… हाम्राहरूले आतङ्कवादीहरूलाई सखाप पारेपछि हाम्राहरूलाई फ्रण्टबाट सारेर अर्कै पल्टन लगेर राख्छ । त्यस ठाउँमा नयाँ पल्टनले पो आफ्नो यूनिटको झण्डी फहराएर आफ्नो पल्टन विजय भएको घोषणा गर्छ ।

गर्ने भन्ने हनुमान जस पाउऩे ढेँढ़ु भनेको यही हो म्याडम ।

यूज एण्ड थ्रो भन भाइ यूज एण्ड थ्रो भन ।

म ता त्यस्तो अङ्ग्रेजी बुझ्दिनँ म्याडम । खायो भाँड़ो अफाल तेरो ठाँड़ो भन्दा कसो होला म्याडम ? हाम्रो समात्ने हाँगा र टेक्ने ठाउँ नभएर पनि होला सर हामीलाई सानीमाकै व्यवहार गरेको होला ।

भयो यस्तो कुरा नगर । य़स्तो कुरा गर्‍यो कि मेरो रगत उम्लिएर आउँछ । सालाहरूलाई खुकुरीले छप्काउनु मन लाग्छ ।

तपाईलाई नै मार्‍यो भने नि म्याडम !

मलाई मार्नु सक्दैन । म ट्राफिक मानेर जीवनको गोरेटोमा हिँड़्छु । रङ् साइडै नहिँड़ेपछि इन्द्रेका बाबु चन्द्रे आए पनि केही नाप्नु सक्दैनन् । मलाई कुनै सम्पर्क छैन । म मेरो मात्रै बुझ्छु । यस बाहिर केही बुझ्ने खाँचो छैन मलाई ।

यस्तो पाराले कसरी हुन्छ म्याडम ?

तिमीलाई के को खसखस ? आफैलाई लिएर, आफ्नै सोंचेर बस्नु सिक ।

म्याडम त्यसो भए देश भड्खालोमा जाओस् ?

देश भड़खालोमा गए पनि, भताभुङ्गै भए पनि आखिर तिमीले के गर्नु सक्छौ ? घरभित्रै बस । बाहिर नहेर…आफ्नो भित्र हेर । आफ्नै दुनो सोझ्याऊ । रङ् साइड नहिँड़. ओयल योर ओन मेसिन ।

०००
सिलीगुडी (भारत)