नेपाली हास्यव्यङ्ग्य अनलाइन पत्रिका

पार्टीको यान यस्तै तरहसित चले गुड्न के पाउला र ?
होलान् हाँक्ने निकै वा नर जब यसले बढ्न के पाउला र ?
स्पष्टै बिग्रिन्छ गाडी जतन रति नभै झन् थपिन्छन् समस्या
घाटा लागेर उल्टै जनमनभरिमा बढ्छ पीडा र कुण्ठा ।
२०१

जे जस्ता देखिए यी गतिविधि अहिले शीर्ष पार्टीहरूमा
हेर्दै स्वार्थान्धताले शिखर छुन पुग्यो मेचका मामिलामा
आशा, विश्वास, निष्ठा जनमनभरिको लाग्छ गर्ल्याम्म ढल्दा
रैतीमा ईख मात्रै दिनदिन चुलियो हीनचर्या नियाल्दा ।
२०२

ठूला नेता भनेका हठसित झगडा द्वन्द्वमा रम्न थाले
कुर्सीका लागि मात्रै नखशिख बलले, यत्नले जम्न थाले
ढाँटेछन् ढाँट्नुसम्मन् रतिभर पछिको मार्ग हेर्दै नहेरी
के भन्दै भोट माग्ने पछि सकस ठुलो पर्छ भन्ने नटेरी ।
२०३

खै केही देखिएनन् शुभशकुन कुनै यी ठुला पार्टिभित्र
सालिन्ने बढ्छ मात्रै द्रुततर गतिले भ्रष्टताको चरित्र
धेरै छन् वृद्ध साँढे हरबखत नयाँ कोरली मेच ठान्दै
ओगट्छन् व्यर्थ फाल्दै सुनसमय भदौका डिँगा अन्ध बन्दै ।
२०४

ठूला ता ढाँट पक्का अबल हुन पुगे नम्बरी ढाँट नै हुन्
साना झन् बिक्न विज्ञापनसहित कुनै ताक पर्खेर ढुक्छन्
पक्का प्याधा बनाऊन् अमुक दल कि वा देशले नै धुपौरे
पारोस् भन्छन् र कुर्छन् यति सरल कुरा बुझ्छ खोलाघरेले ।

०००
(स्रग्धरावलीबाट)