नेपाली हास्यव्यङ्ग्य अनलाइन पत्रिका

खाेलाघरे साहिंलाे :

सत्ताका चाकडीमा जिउहजुर गरी स्वार्थ साध्नेहरूले
बक्स्यो,गैस्यो रटेरै शिर नत हुनुमा गर्व गर्नेहरूले
चोरीस्यो माल आहा ! कुशलतम कला,बेश गर्सिन्छ आची !
भन्दै संस्कार झोले स्वपतन नबुझी थालिए आत्मघाती । १।

नेताका भ्रष्टचर्या अधिकतम बुझी स्वार्थकै लागि बिक्ने
जो हुन् माखा धपाई पछिपछि तिनकै मात्र तारीफ गर्ने
झोला बोक्ने तिनै हुन् क्रमसँग तिनको बन्छ संस्कार झोले
यी झोलेले गिजोले हितकर र भला नीति सारा बिथोले ।२।

ठूलो नेता भनेको पनि अझ गतिलो शक्तिको बन्छ झोले
लाई आफ्ना धुपौरे पछिपछि निमुखा बन्छ आफैं धुपौरे
यस्तै झोलेहरू हुन् जनक न जननी,देश चिन्दै नचिन्ने
कौडीमा आफु बिक्ने कलछलबलले चाप्लुसे झुण्ड किन्ने ।३।

झोला आफ्नै जुनीको अति जतन गरी बोक्छु धान्दैछु चोला
आजैका लागि बोकें नियत छ यति नै भोलि होला नहोला
भर्ने गोला,पिरोला,सकस,सुख,खुशी छन् नदी,सिन्धु खोला
रोजै भर्दोछु रित्तो छ तर दिनदिनै,यो दिगो भो झमेला ?।४।

साँच्चै हो यो खिचोला ? छ कि सबुत कुनै गर्छ कल्ले खिचोला?
नाफा घाटा मिलाई गणकसरि भई बस्छ को त्यो अबोला ?
झोले नै हो कि सारा मनुज र सबको वृत्ति ठेक्का छ झोला ?
“झोले” निर्क्यौलदाता निरुपक अब छन् मात्र कैलाशभोला ! ५।

आफ्नो झोला सबैको उदर भरजुनी बोक्नुपर्नेछ, बोक्छन्
जे छन् सम्पाद्य गर्दै यससँग यसकै मन्त्र वा स्तोत्र घोक्छन्
मेरो आफैं म झोले नियतिवश हुने तोकिएको हुनाले
भोलेको बन्नु झोले बरु उचित भनी ठान्छ खोलाघरेले !६।

००० 
काठमाडाैं