खोलाघरे साहिँलोेकाठका पुतली धन्य !
मिच्यो भारतले सीमा शयौं ठाउँ, प्रमाण छन् कुरो चल्दा उसै गल्छन्, पन्छिन्छन् आलटालमा ।
खाेलाघरे साहिँलाे :
नाच्छन् अन्यत्रका चम्चा,बज्दै बेढब हालमा
धराेधर्म लहै ! कालाे पाेतिने भाे हिमालमा !
जनता सपना देख्छन्, कोरल्छन् सपना- शिशु
डाँका निर्दाेष भै घुम्छन्, पर्दछन् साधु जालमा ।
खरायाे चालमा उफ्र्याे याे देश गणतन्त्रमा
बाध्य छन् सपना घाेट्न रैती कच्छप चालमा ।
भूकम्प, बाढीका पीडा बढ्दैछन् छैन राहत
जाडाे, गर्मी बितेको छ कालाे प्लास्टिक पालमा ।
मिच्यो भारतले सीमा शयौं ठाउँ, प्रमाण छन्
कुरो चल्दा उसै गल्छन्, पन्छिन्छन् आलटालमा ।
वैशाखी अन्यकै टेकी फलाक्छन् गुणग्राहिता !
कीर्तिमानी ठुलै होला गुलामीका सवालमा !
काठका पुतली धन्य ! त्याे नियन्त्रित नर्तन
जाेसुकैले खिचाेस् धागाे नाच लाै भिन्न तालमा ।
०००
“पत्तासाफ” गजलसङ्ग्रहबाट
Subscribe
Login
0 Comments
Oldest
