नेपाली हास्यव्यङ्ग्य अनलाइन पत्रिका

खोलाघरे साहिँलो :

‎ए हाम्रा प्रिय पौरखी अनुज हो ! हाम्रो जिमीका युवा !
‎तिम्रो शक्ति प्रशंसनीय ठहर्यो, पाइन्न नै तुल्यता
‎अर्बौं वा खरबौं अझै अधिकको सम्पत्ति सिद्ध्याउन
‎बेरै लाग्नु परेन झट्ट सकियो, मिल्दा सबैका मन ।१।

‎ठूला गौरवका निकेतन सबै ढाल्ने सबै धन्य छन्
‎जेले ध्वस्त गरे अपूर्व बलिया ती हात नै धन्य छन्
‎तिम्रा हात युवा यसै रित चलून् ढाल्ने कुरा छन् अझै
‎जेले कीर्ति बखान्छ यो मुलुकको बाल्ने कुरा छन् अझै ।२।

‎गर्दा के नहुने रहेछ र यहाँ हस्ती भनेका ढले
‎मान्नै पर्दछ यो पराक्रम ठूलो, मान्ला सबै विश्वले
‎नाथे देश त हो रसातलतिरै जाओस् कि जे जे गरोस्
‎ध्वस्तै पार्नु छ लक्ष्य, शेष जनता बाँचोस् कि चाहे मरोस् !३।

‎आओ ए नव नौजवान अब लौ आओ लगत्तै जुट
‎जे जे शेष छ सिर्जना विगतको आगो लगाऊ,भुट
‎अर्काको इतिहास मात्र छ सबै के रट्नु ती गन्गन
‎आफ्नो कीर्ति रचेर भस्म युगको आफ्नै गरौं कीर्तन ।४।

‎आओ भीड मिलेर फेरि गतिला दर्बार भत्काउन
‎पुल्ठो लाउन जोशिई उठ सबै यो राष्ट्र सल्काउन
‎तिम्रै कर्मठ हात योग्यतम छन् जो देखियो प्रष्ट छ
‎देशै भस्म गरेर विश्वभरि नै तातो खरानी छर ।५।

०००
फाकफोकथुम- ४, इलाम