नेपाली हास्यव्यङ्ग्य अनलाइन पत्रिका

खोलाघरे साहिंलो :
‎

‎मेरी भार्या छ खास्सा हरपल हँसिली झर्किने छैन बन्दै
‎यो झ्वाँकी छैन सत्ते! मप्रति हरपला स्नेह राख्छे बिछट्टै
‎दुष्टा भै प्रातसाँझै करकर घरमा गर्न जान्ने भए पो !
‎मुस्काई बोल्न थाल्छे श्रवणप्रिय कुरा थाक्न जान्ने भए पो !
‎। १।
‎
गन्दा आधा शताब्दी हिउँद बितिसके साथ हाम्रो जुटेको
‎यस्तो जोडी मिलेको घरजम त कतै छैन है देखिएको
झ्याईँझ्याईँ बजाई नउमति नगरा ल्याउँदाकी उज्याली
‎ऐले ता झन् उज्याली झलमल नभकै खास पूर्णेन्दुजस्ती ।२ ।

‎आत्मश्लाघा नगर्ने,अझ परिजनको खोइरो नै नखन्ने
‎मामूली काम गर्दै पनि अजङ ठूलो हूं गरेको नभन्ने
‎चाहे फोरोस् पहाडै बरु परिजनले तुच्छ ,सिन्को नठान्ने
‎आफ्नो बेथा नभन्ने भुतुतुतु सबको बेस्सरी ख्याल राख्ने ।३।

‎मेलो वा काम गर्दा कति युगलसरी ठस्किने हैन कैल्यै
‎जिस्क्यौली चल्छ उम्दा सहजसित शब्दका रङ्ग घोल्दै
‎कस्तो स्वाँठो र नाठो, शठ, कृपण,छुसी,शण्ड, जैरे फटाहा
‎यस्तो केही नभन्दा अतिशय खुश भै झुम्छु रोजै म आहा !।४।
‎
नातागोता कतैका वरपर रहने बन्धु वा इष्टमित्र
‎मामा, भेना र सम्धी, गुरुजन, ससुरा अन्य सम्बन्धभित्र
‎आऊन् जोजो जहाँका गनगन भुतुतू आदि गर्ने भए पो !
‎न्यानो आत्मीयताले घरभरि घुइँचो पाहुनो पल्किने भो ।५।
‎
‎खोलौं यस्तो सुलच्छिन् वरपर सबमा आफू फुर्के भइन्छ
‎बोकीराखूँ कहाँ यो अतिशय गुणको भार थाप्लो थिचिन्छ
‎छोराछोरी खुशी छन् यतिविधि घरको शान्ति देखी सधैंको
‎ठान्छन् आदर्श यस्तै हरघर बनिए स्वर्ग लाग्नेछ निम्जो ।६।

०००
फाकफोकथुम- ४, इलाम