आर.आर. चौलागाईंछाता
आज हामी छाताविहीन भएका छौँ हिजो जस्तो कोही छैनन् हाम्रा तथाकथित ‘प्रभु’ कोही छैनन् हाम्रा तथाकथित ‘मुक्तिदाता’ र आज हामी आफ्ना लागि आफैँ रक्षक भएका छौँ आफ्ना लागि आफैँ रखवाला भएका छौँ ।
छाता थियो ऊ हाम्रो
मेड इन नेपाल
दुई हजार छ ।
हामीलाई भन्थ्यो ऊ
“तिमीहरूलाई घामबाट बचाउँछु
तिमीहरूलाई पानीबाट जोगाउँछु ।”
एक दिन छाता च्यातियो
र दुई टुक्रा भयो
आफूलाई टालेनन्
आफूलाई जोडेनन् उनीहरूले
आमाचकारी गाली गर्दै
धेरै भागमा बाँडिए
र आफूआफूलाई नै सक्कली भन्न थाले ।
घाममा धेरै डढ्यौँ हामी
पानीमा धेरै रुझ्यौँ हामी
कहाँ पायौँ र छाता !
कहाँ पायौँ र आश्रय !
बरु उनीहरूको बहुलट्टीमा
धेरै मान्छेहरू भाँडिए
धेरै मान्छेहरू मरे
धरती रक्ताम्मे भयो
सम्बन्ध चिराचिरा भयो ।
आज हामी छाताविहीन भएका छौँ
हिजो जस्तो कोही छैनन् हाम्रा तथाकथित ‘प्रभु’
कोही छैनन् हाम्रा तथाकथित ‘मुक्तिदाता’
र आज हामी
आफ्ना लागि आफैँ रक्षक भएका छौँ
आफ्ना लागि आफैँ रखवाला भएका छौँ ।
०००
हालः सिड्नी, अस्ट्रेलिया
Subscribe
Login
0 Comments
Oldest
