संप्रस पाैडेलमेरा भगवान
रामका भक्तलाई बाँदर दलका भक्तलाई हनुमान भनिरहेछु, हो, म भगवान छोडेर भौमानहरूको पूजामा तल्लिन छु ।
कोही भगवान खेतमा छन्
दुनियाँका लागि खाद्य उत्पादन गर्दैछन्
कोही भगवान जेलमा छन्,
तब न सरकार ढालिरहेका छन् ।
कोही भगवान आरोपपत्र बोकेर
अदालत धाइरहेछन् ।
कोही भगवान धरौट बुझाएर
चउरमा उफ्रिरहेछन् ।
कोही भगवान
आफ्नो हत्यारा खोज्दा खोज्दै
मरिसकेका छन् ।
कोही भगवान
न्याय पाइने आशमा
भगवान भैसकेका छन् ।
घोरकली यही हो कि जस्तो लाग्ने
हे दैव,
शिवजी पनि आजकाल स्यालुन जान्छन्
अनि पो डिजिटल फोटोमा
चट्ट जुँगादाह्री लिएर आएका छन् ।
उनै महादेव जीमखानाबाट बाहिरिएर
बुलेट मोटरसाइकलमा
पत्नी घुमाइरहेका भेटिन्छन् ।
उनै शिवजी आजकाल
चिलिम होइन
रेष्टुरेन्टमा फ्लेभरवाला हुक्का
तान्दै गरेका भेटिन्छन् ।
रामका भक्तलाई बाँदर
दलका भक्तलाई हनुमान भनिरहेछु,
हो, म भगवान छोडेर भौमानहरूको
पूजामा तल्लिन छु ।
०००
२०७९ फागुन ६, हेटौंडा
Subscribe
Login
0 Comments
Oldest
