नेपाली हास्यव्यङ्ग्य अनलाइन पत्रिका

अचम्मको छ मेरो भोक
सधैँ भोकमात्र लागि रहन्छ
भोक लाग्दा सिङ्गै आकाश निल्दा पनि
सन्तुष्टि हुँदैन मलाई
ढुङ्गा, बालुवा माटो, पानी निल्दा पनि
मन र पेट भोकै हुन्छ ।
मेरो आहारा विश्वमा उत्पादन नभए झैँ
सुपणर्खाको मुख झैँ
सधैँ आहाराकालागि मेरो मुख आँ गरिरहन्छ ।

पेटभित्रका आन्द्राहरू सधैँ आन्दोलित भैरहन्छन्
भोक मार्न नाराहरू घन्काउँछन्
म त्यो सबै सुनिरहन्छु र आँ मुख बाएर
आहाराको खोजीमा भौतारिन्छु ।
भौँतारिदा हावामा धेरै हण्डर खाए
हावामा बतासिएर भोक मेट्न
अनेकौँ प्रयास गरे तर भोक मत्थर भएन ।

मेरो भोकको कथा कुनै जोक होइन
यो देशमा मेरो भोक मेट्ने भकारी नै रित्तो छ
अझैँ मेरो भोकको परिधी आकार प्रकार बढिरहेको छ,
भनौँ मेरो भोक कुनै राक्षसको आकांक्षा हो
मृत्यु सैयामा पुग्दा पनि जति खायो उति नै भोक लागिरहन्छ ।

अझ मिष्ठान्न चौरासी व्यञ्जन खोजी रहने
मेरो भोकले विश्व रेकर्ड कायम गरेर गिनिज बुकमा
नाम लेखाउँने प्रयास गरिरहेको छ ।
भनौँ म भोकको भकारी हुँ हन्तकाली हुँ
जति खाए पनि नअघाउने म गिद्ध हुँ
सधैँ सिनो लुछिरहने
खाएको शरीरमा नलाग्ने सुकेनास रोगको घर हुँ ।

०००
गाईघाट, उदयपुर