नेपाली हास्यव्यङ्ग्य अनलाइन पत्रिका

काईंला बा आफ्नै नगरपालिकामा प्रमुख हुनुहुन्थ्याे

तर वहाँलाई प्रमुख अतिथि हुने इच्छा जागेछ

खै किन वहाँलाई यस्ताे लागेछ ?

हजुरलाई चार वर्ष
सम्पूर्ण घरको तालाचाबी जिम्मा लगाएका छौं
फेरि किन यो घरकै अतिथि बन्न रहर गर्नुहुन्छ ?
घर मालिक पनि
त्यै घरको अतिथि हुन्छ र ?

के छ हजुर त्यो अतिथिमा ?
अतिथि त कहिलेकाहिँ आउने हो
मीठो मसिनु खान पाउने हो
पाए धरो पनि लाउने हो
त्यतिमै आफ्नो मालिकत्वलाई बिर्सिएर
अतिथि बन्न किन लोभ गर्नुहुन्छ ?
घर तपाईंको जिम्मा भएपछि
पढ्ने कोठामा जो बसे पनि
भंडारमा जो पसे पनि
सबै जिम्मा तपाईंको हो
अतिथि होइन
त्यसको मालिक तपाईं पो हो ।

बोल्न मनलागे
आफूलाई प्रमुखवक्ता भन्नुहोस्
देखाउन मनलागे
आफूलाई प्रमुख आकर्षणमा गन्नुहोस्
ताला चाबी तपाईंकै भएपछि
हजुरलाई जे मनलाग्छ बन्नुहोस्
तर अतिथि चैं नबन्नुहोस्
किनकि आफ्नु घरभित्र
कोहि अतिथि हुँदैन
अतिथिलाई कसैले तालाचाबी जिम्मा लगाउँदैन ।

०००
गौरादह, झापा