नेपाली हास्यव्यङ्ग्य अनलाइन पत्रिका

यौटा मोटो डोरो थियो भाग-बण्डा भयो
सात भाइ छोरालाई मिल्यो यौटा पयो ।
भिन्नाभिन्नै भए भाइ बने कोही साँढे
एकतामा गाँसिएका भाइलाई भाँडे ।

मोटो डोरो एकैचोटि तोड्न नसकेर
सात पयो बनाउन तम्से यतिखेर ।
जब भयो चिराचिरा डोरो भयो झिनो
खाने भए लुछी-लुछी गिद्धले झैँ सिनो ।

षडयन्त्र हुँदैछ यो डोरो चुँडाउन
एक-एक गरी खान, भाइ लडाउन ।
विदेशीले भित्र्याउने गरेका छन् आँट
स्वाभिमान बचाउने छैन छाँट-काँट ।

यति यौटा कुरो बुझ्ने नेता भए हुन्थ्यो
एकताको डोरो यौटा भए कल्ले छुन्थ्यो ?
एकताको गाँठो हुन्छ सुरक्षामा दरो
यही गाँठोभित्र हाम्रो बसेको छ जरो ।

एकताको डोरो आज छिन्न-भिन्न भयो
डोरोसँगै छोरो पनि एकोहोरो भयो ।
‘गङ्गे’ भन्दै डुबाएर जङ्गे पिलर गयो
भाँडभैलो भएपछि के-के भयो-भयो ।

हुँदै गयो दायाँ र बायाँ
मुलुक नै पारेर दोछायाँ ॥

०००

नागार्जुन-१, रानीवन, काठमाडौं
९८४१४९१०८१