नेपाली हास्यव्यङ्ग्य अनलाइन पत्रिका

भीड !
ओ भीड !
भीड महाशय,
आँशु बेच्नेलाई
स्याबासी दिनुहुन्छ ।
हाँसो बेच्नेलाई
लोपार दिनुहुन्छ ।
कहिले समाचारको ’कमेन्ट’ मा
बदमासलाई भगवान बनाउनुहुन्छ,
कहिले सञ्जालको जञ्जालमा
बौद्धिकलाई कुख्यात तुल्याउनुहुन्छ ।

तपाईंमै छ,
चिसैपानीले खुइल्याउन सक्ने ल्याकत
तपाईंमै छ,
तातोपानीले ठिर्राउन सक्ने तागत ।

धेरैचोटी अरूले
तपाईंलाई नै बेचिदिए
तपाईं अनेक नाममा
बेचिन तयार हुनुभो-
एकदिन शिक्षक हुनुभो
ट्युसन पढाएर
घाँटी बेच्नु भो ।

अर्कोदिन पत्रकार बन्नुभो
थुप्रै अखबारमा
समाचार बेच्नुभो ।

झन् अर्कोदिन नेता बन्नुभो
परपर ताली ठोकेर
आफैँलाई बेच्नुभयो ।

हो भीड,
ठूलो माछाले सानो माछा खान्छ तर
सानो भीडले ठूलो भीड खाएको
हामीले नै देखेका छौँ,
पहिले बल्छिमा तानेको तपाईं
आज बल्छीमा राखिन बेचिनुभएको छ ।

भीड सस्तोमस्तो
जस्तो तरिकाले होस्
खुद्रा, थोक जस्तोसुकै होस्
यथाशीघ्र बिक्रीमा छ ।

०००
२०७९ चैत्र ७
विश्व कविता दिवस