नेपाली हास्यव्यङ्ग्य अनलाइन पत्रिका

१
पचाउन सकेँ मैले न बौद्धिक प्रदूषण
न त चाहेँ स्वयम्लाई बनाइदिन चारण
स्वार्थको बलिवेदीमा स्वाभिमान चढाइन
हे इन्द्र ! स्वर्गमा तिम्रो त्यसैले म अटाइन

२
प्रतिभाको न ता आफ्नो विज्ञापन गरी हिँडेँ
दलका भरिया बन्दै बैतर्नीमा न ता गिरेँ
कसैलाई उचाल्ने र पछार्ने खेल खेलिन
हे इन्द्र ! स्वर्गमा तिम्रो त्यसैले म अटाइन

३
एकोहोरो अहोरात्र सत्यको पथमा हिँडेँ
अवरोधहरू आए डटी सङ्घर्षमा भिडेँ
असत्का साथ सम्झौता कहिल्यै गर्न मानिन
हे इन्द्र ! स्वर्गमा तिम्रो त्यसैले म अटाइन

४
म यौटा गाउँले मान्छे र त्यो हो अमरावती
मेरो ग्राम्य कुलाचार,तिम्रो नागर संस्कृति
तिम्रो संस्कारमा रम्न आफ्नो संस्कार फालिन
हे इन्द्र ! स्वर्गमा तिम्रो त्यसैले म अटाइन

५
गाईलाई भनेँ गाई, गधालाई भनेँ गधा
विवेकको गरेँ पूजा मानी ईश्वर सर्वदा
गला इमानको रेटी महमा डुब्न चाहिन
हे इन्द्र ! स्वर्गमा तिम्रो त्यसैले म अटाइन

६
म काग नै रहेँ, डाँफे बन्न प्वाँख रँगाइन
चर्चाको प्यासमा मीत चमेरासित लाइन
दृष्टिबाट स्वयम् आफ्नो झर्ने बाटो समाइन
हे इन्द्र ! स्वर्गमा तिम्रो त्यसैले म अटाइन

७
यौटै रूप रह्यो मेरो समान भित्र-बाहिर
मखुन्डोको भएँ द्वेषी पारदर्शी सबैतिर
जे देख्यो ब्रह्मले, लेखेँ-बोलेँ चिल्लो लगाइन
हे इन्द्र ! स्वर्गमा तिम्रो त्यसैले म अटाइन

८
मदारीको इशारामा भालू-नाच म नाचिन
चौका हानेर मौकामा चुलिने स्वप्न साँचिन
“निगाहा होस् प्रभो !” भन्दै शक्तिपीठ म धाइन
हे इन्द्र ! स्वर्गमा तिम्रो त्यसैले म अटाइन

९
म चेपारे र छेपारे-हरूदेखि सुदूर छु
कोहिनूर तिनै तिम्रा र म अन्यन्त झूर छु
तिम्रो आफन्तमा पर्न म पटक्कै सुहाइन
हे इन्द्र ! स्वर्गमा तिम्रो त्यसैले म अटाइन

१०
एकै जिब्रे भएँ जैल्यै, दुई जिब्रो रुचाइन
‘अहो रूपम् !’ भनी कैल्यै गर्दभी राग गाइन
रमेँ आफ्नै पसीनामा,अन्त र्याल चुहाइन
हे इन्द्र ! स्वर्गमा तिम्रो त्यसैले म अटाइन

११
लुकी कम्मल ओढेर कहिल्यै घिउ खाइन
‘रामराम’ भनी मैले छुरा-कैँची चलाइन
पाली सङ्कीणर् सिद्धान्त गिदी आफ्नो कुहाइन
हे इन्द्र ! स्वर्गमा तिम्रो त्यसैले म अटाइन

१२
योग्यताका कसी तिम्रा— चाकरी चाटुकारिता
मलाई मृत्यु स्वीकार्य, छैन स्वीकार्य दासता
म अयोग्य हुनाले नै तिम्रो प्रणय पाइन
हे इन्द्र ! स्वर्गमा तिम्रो त्यसैले म अटाइन

०००
चारण : भाट । अमरावती : स्वर्गको राजधानी । प्रणय : प्रेम ।

हेटौंँडा