नेपाली हास्यव्यङ्ग्य अनलाइन पत्रिका

निर्मोही व्यास :

“जहिले जहिले हुन्छ लोकमा धर्मको क्षय
अधर्म र अनाचार-असत्-अन्यायको जय,
गर्न सज्जनको रक्षा, दुष्टको हर्न जीवन
उकास्न धर्म, प्रत्येक युगमा जन्मनेछु म ।१

गरेथ्यौ कृष्ण ! यो वाचा आफैँले,किन बिर्सियौ ?
देखे पनि नदेखेझैँ गर्‍यौ, नयन चिम्लियौ
तिमी वचनका कच्चा रहेछौ पो बुझौँ कि त !
यदि पक्का हुँदा हौ त अधर्मी मास्दथ्यौ नि त ।२

बोलवाला अधर्मीकै छ आज दुनियाँभरि
बम-बारुदले मान्छे मारिँदै छन् चरासरि
चौतर्फ चुलिएको छ विसङ्गति र बेथिति
उदाहरण काफी छ “हाम्रो नेपालकै स्थिति” ।३

छिमेकी साँध मिच्दो छ,देशै निल्न तयार छ
घरका भँडुवाबाट उत्तिकै झन् प्रहार छ
जुटेका छन् सबै लुट्नै, दिँदै नारा विकासको
सुनौला सपना बाँड्दै गर्छन् खेती विनाशको ।४

ढाकेका छन् अधर्मीले, र सर्वत्र विभेद छ
सोझा-सज्जनका निम्ति यत्रतत्र निषेध छ
बाङ्गा-नाङ्गाहरू नाच्छ्न् मर्काईकन कम्मर
हिँड्छन् अभय पाएर खुल्ला खूनी र तस्कर ।५

गर्दा राक्षसले राज्य, सङ्कटग्रस्त देश छ
अझै भनौँ त, “नेपाल” नाउँमा मात्र शेष छ
पर्खँदैमा तिमीलाई हाम्रो बित्नेभयो जुनी
बिन्ती छ ! भन लौ साँच्चै, जन्मन्छौ कहिले तिमी ?६

०००
हेटौंडा