नेपाली हास्यव्यङ्ग्य अनलाइन पत्रिका

भएछन् अरू दास तिम्रा, भनेर
मलाई सँगै किन्न खोज्यौ कुवेर ?
०
हुँ राजा स्वयम्, हैन रैती म तिम्रो
म चाहे रहूँ झोपडीमै रमेर
०
छ धर्ती ठुलो, साँघुरै मात्र देख्ने
स्वयंको निकम्मा तिमी दृष्टि फेर
०
हुँदैनन् सबै चाकरै ‘स्वत्व’ सुम्पी
छुसी द्रव्यको मोहनीमा परेर
०
तिमी घाम हौला कि वा जून,तारा
म आकाश सिङ्गै, बसेको डटेर
०
कुनै धूर्तको वैभवी दम्भसामु
कहाँ झुक्तछन् स्वााभिमानी गिरेर !
०
तिमी नक्कली, झूट ‘झिल्के मयूर’
म कागै हुँला, किन्तु खाँटी छु हेर !
०
बिरालो कराएर तर्सन्न बाघ
मुसा हो र दब्ला दुलामा पसेर ?
०
हुँ चेलो हठी ‘देवकोटा’ हरूको
र ओकल्छु आगो म ‘बागी’ बनेर
०
बनेको छु बेग्लै कडा धातुले म
मलाई अरूसङ्ग दाँजी नहेर ।

०००
हेटौँडा