नेपाली हास्यव्यङ्ग्य अनलाइन पत्रिका

विशुद्ध हास्य रचना हो । कतै संयोग परेर मिलेमा क्षमा चाहन्छु ।

तिनोटा मु्ख्य छन् हाम्रो चिनारीका नयाँ कडी
बयान गर्न लागें म नहेरी नाडीको घडी ॥

गफ गर्ने गफै चुट्ने पहिचान छ अग्रिम
गफाडीहरूको भिन्नै पहिले गफ गर्छु म ।

आमाले बाबु बिर्सन्छन् पत्नी छन् पति बिर्सने
हडताल भए पुग्छ बेर्थै के अरु सम्झने ॥

रुखबाट खस्यो कोही बाटो बन्द गरे भयो
लोग्ने स्वास्नी गरे लड्डी देशै बन्द गरे भयो ॥

क्षतिपूर्ति लिंदै घिच्तै दारुले पेट भर्दछौं
नेपालै मात्र के हामी विश्व नै बन्द गर्दछौं ॥

थपेर गफमा टुक्का हुक्का झैं टर्टराउँछौं
काम गर्न परैबाट छाडेर थर्थराउँछौं ॥

गफ हड्ताल टुक्कामा गफै केही गिजोल्छु म
जेजस्तो गफको यात्रा केही चाँडो छिचोल्छु म ॥

गफाडीहरूमा हामी विश्वमै अग्रगण्य छौं
गफै गर्न नजान्नेमा जति छौं ती नगण्य छौं ॥

खाना नै गफ हो हाम्रो नाना हो गफको कडी
खाना नाना र गानामा बितेका छन् पला घडी ॥

गफैमा जोतिएका छौं गफमै हामी मस्त छौं
गफका खेतमा धान रोप्नमा हामी व्यस्त छौं ॥

गफैमा सपना देख्छौं गफैमा विपना पनि
मानौं हामी बनेका छौं गफाडीहरूमा धनी ॥

छाड्लान् कि गफको खेती नसोच्नु थोतिएपछि
संसारै भुल्दछौं हामी गफमा जोतिएपछि ॥

यता हेर्‍यो त्यतै हुन्छन् गफैका माथि टिप्पणी
यिनै हुन् कि भनेजस्ता गफाडीका शिरोमणि ॥

गफमा चुस्त छौं हामी गफै गर्न दुरुस्त छौं
गफ बाहेकको कर्म गर्नमा केही सुस्त छौं ॥

गफ खान्छौं गफै सुत्छौं गफैमा शौच गर्दछौं
भोकसोक सबै हामी गफैका भर पर्दछौं ।

गफै हो देवता हाम्रो गफै हो नव सिर्जना
गफाडीहरूका लागि गफैको हुन्छ तिर्सना ॥

ज्या है लौ किन बिर्सेंछु अर्को हाम्रो विशेषता
गफकै बाढीमा बग्दै पुगिएछ कता कता ?

पहिचान दिने हाम्रो बिर्सिएछु ठुलो कडी
दुनियाँ भरका हामी हडताल शिरोमणि ॥

हड्तालीहरूका राजा हड्तालीहरूका गुरु
हाम्रो संस्कार हड्ताल हाम्रै हड्ताल आबरु ॥

घर होस् कार्यशाला होस् छानी छानी डढाउँछौं
कक्षामा जान रोकेर हडताल पढाउँछौं ॥

हाम्रा उन्नतिका चोक्टा लाम्टा खाना खटाउँछौं
गफाडी झुन्ड छानेर काठमाडौं पठाउँछौं ॥

हरिया दाँत लाएर गफ गर्छौं अहर्निश
दन्त बझानमा हामी थाल्दछौं बार बत्तीस ॥

बैरीका गुन गाएर थोत्रो थाल ठटाउँछौं
बैरीकै घरमा बासी खान छोरा पठाउँछौं ॥

बैरीको हातमा देश जिम्मा लाएर बस्तछौं
उसैको सिठुवा खाई बँधुवा भई बस्तछौं ॥

आन्द्रो झर्ला भनेजस्तो गफै गर्छौं निरन्तर
दुनियाँ भरमा आज हामी झैं अरु को छ र ?

अरुको के कुरा गर्ने छाडौं कि अरुका कुरा
गफाडी हामी हौं भन्दै सुर्कने किन पाखुरा ?

गफ उद्योगमा हामी एक्लै आकाश पुर्दछौं
रात होस् दिन वा साँझ गफैका लागि कुर्दछौं ॥

दारु उद्योग खोलेर गफ उद्योग चल्दछन्
दारुभोगीहरू मिल्दा गफैमा स्याउ फल्दछन् ॥

लौ भयो लौ भयो भैगो गफाडीहरूका कुरा
गफैका झोकमा फेरि उम्रेलान् तिनका जुरा ॥

यता फक्र्यो यतै हुन्छ गफाड्ताल सधैं भरि
बिना हड्तालले हाम्रो देश बिग्र्यो कठैबरी ॥

गफ संस्कृति हुर्काऔं गफाडी जगडा गरौं
गफाडीहरूमा विश्व कीर्तिमान खडा गरौं ॥

सुनौलो छ नयाँ अर्को हाम्रो यौटो विशेषता
त्यस्तो विशेषता छाडी लागेंछु म कता कता ॥

प्वाक्क पारेर टुक्काले बोलीलाई सिँगार्दछौं
दारुका भोगीको जस्तो अमिलो मुख पार्दछौं ॥

कामको के कुरा गर्ने छाडौं त्यो कामका कुरा
टुक्का हाल्नु छ जेभाँती सुर्कौं मुस्तन्ड पाखुरा ॥

सभाको माझमा टुक्का हाली उग्रै हँसाउँछौं
विरोधीहरूको सेखी टुक्काबाट बसाउँछौं ॥

गफ हड्ताल टुक्कामा हाम्रो यो पहिचान छ
गफ हाँक्छौं गफै खान्छौं यो हाम्रो स्वाभिमान छ ॥

पछिल्लो याममा हाम्रो अर्को एक विशेषता
थपिएको छ भुलें मैले लागें अन्तै कता कता ॥

गफाडीहरूमा हामी उच्च छौं लौ भनें भनें
संसारै भरका हाम्रा गफाडी हुन् मने मने ॥

॥ इति गफाड्ताल टुक्का महिमा समाप्तम् शुभम् भूयात् ॥

०००
भद्रपुर, झापा