नेपाली हास्यव्यङ्ग्य अनलाइन पत्रिका

अशान्तिले सताएको सातो बोलाउँदै
असिनाले ठटाएको बोट उठाउँदै-
चन्द्र-सूर्य झन्डा उच्च उचालेर आऊ
सादा जीवन, उच्च विचार उकासेर आऊ ।

विकृतिको धरहरा भएको छ खडा
पाखण्डीका पक्षपाती भएका छन् बडा ।
दिन-रात रडाको छ संघीयता माझ
धान्न पनि धौधौ भयो राष्ट्रियता आज ।

अनेकता जताजता, एकता छ बाङ्गो
अभावको पहाड छ, सम्पन्नता नाङ्गो ।
नीतिबिना नेता बने गतिमति हीन
तिमीलाई पर्खिएर बितेको छ दिन ।

नेतालाई नैतिकता घोकाउँदै आऊ
स्वावलम्बी राष्ट्रियता बोकाउँदै आऊ-
हितकारी भावज्योति छिराउँदै आऊ
अत्याचारी, भ्रष्टचारी गिराउँदै आऊ ।

आउँदाखेरि शान्तिसँगै शाली पनि ल्याउनू
उत्साह र कान्तिसँगै बाली पनि ल्याउनू ।
एकताका निम्ति नयाँ डोरा-डोरी ल्याउनू
हितकारी धर्म धान्ने छोरा-छोरी ल्याउनू ।

तिमी आउँदा कोदाली, फाली
ल्याउनुपर्छ विकासे उकाली ॥

०००
लमजुङ