नेपाली हास्यव्यङ्ग्य अनलाइन पत्रिका

प्यारो प्राण समान देश कसरी बेहाल बन्दै गयो
रित्याए ढुकुटी मिलेर सबले निष्ठा खरानी भयो
दर्दै दर्द सहेर बाँच्नु छ भने के काम भो हर्षको
के लेखूँ शुभकामना म अहिले निस्तो नयाँ वर्षको ।१

मारामार मुटाव मात्र जनमा खाँचो छ आत्मीयता
नेकी नैतिकता नरत्व नहुँदा सङ्कीर्ण सामीप्यता
स्वार्थै स्वार्थ बढे सुकर्म सकिए मन्दी छ उत्कर्षको
के लेखूँ शुभकामना म अहिले निस्तो नयाँ वर्षको ।२

बिर्से वीर पराक्रमी पुरुषका गाथा गुणी ज्ञानका
पुर्खाका पहिचान पावन कथा सर्वोच्च सम्मानका
लत्याए इतिहास बेकदर भो सम्पूर्ण सङ्घर्षको
के लेखूँ शुभकामना म अहिले निस्तो नयाँ वर्षको ।३

काला कर्तुतको सधैँ रगरगी पैसा भयो ताकत
बढ्दा लोभ र लालसा दिनदिनै आँधो भयो आदत
आफ्नै मात्र भयो बखान बलियो दुत्कार संश्पर्शको
के लेखूँ शुभकामना म अहिले निस्तो नयाँ वर्षको ।४

चोखो छैन विचार शुद्ध मनले सोच्दैन कोही यहाँ
बिक्री हुन्छ विवेक उच्च दरमा सत्कर्म मिल्ने कहाँ
धज्जी धेर उड्यो रहेन मनितो निष्पक्ष निष्कर्षको
के लेखूँ शुभकामना म अहिले निस्तो नयाँ वर्षको ।५

०००
चन्द्रागिरी नगर पालिका- १३, काठमाडौँ
हाल : न्युयोर्क, अमेरिका