नेपाली हास्यव्यङ्ग्य अनलाइन पत्रिका

देश फलोस् फुलोस्- नववर्षमा- १

अमृतको गागर मेरो देश,
फलोस् फुलोस् – नववर्षमा ।
शान्त कुसुमाकर मेरो देश,
फलोस् फुलोस् – नववर्षमा ।
प्रथम दिवसको दिवाकरले,
ऊर्जा उजागर होस् देशमा ।
जाँगरको सागर मेरो देश,
फलोस् फुलोस् – नववर्षमा ।

नववर्ष होस् आत्माभिमानको- २

यो नववर्ष होस्, जनकल्याणको ।
यो नववर्ष होस्, देश निर्माणको ॥
परनिर्भरताबाट पाउनै पर्छ त्राण ।
यो नववर्ष होस् आत्माभिमानको ॥

उमङ्ग तरङ्गको उत्कर्ष होस्- ३

प्रत्येक दिन जीवनको नयाँ वर्ष होस्
सबैको मुहारमा मुस्कान सहर्ष होस् ।
एकदिन एक गते बैशाख मात्र किन ?
वर्षभरि नै उमङ्ग तरङ्गको उत्कर्ष होस् ।

करुणा घोल्नु छ नववर्षमा- ४

नवअवसरको झ्याल, खोल्नु छ नववर्षमा ।
जे गर्छौं त्यही वचन, बोल्नु छ नववर्षमा ॥
ऊर्जालाई झन् उजागर, गर्नु छ नववर्षमा ।
कटुता होईन करुणा घोल्नु छ नववर्षमा ॥

०००
विराटनगर