नेपाली हास्यव्यङ्ग्य अनलाइन पत्रिका

भोलानाथ सुबेदी :

हामीहरू यस्ता स्वादे भएका छौँ
धेरै सस्ता ग्वाँचे भएका छौँ
जसले पनि बेचिदिन सक्छ हामीलाई
आफू आफैँमा बेबारिसे भएका छौँ
हामीलाई बेचेर उनीहरू चुनाव लडे
हामीलाई बेचेर उनीहरू विदेश सयर गरे
कतिले
श्रीमतीलाई समानुपातिक सिट किने
कतिले मन्त्री पद बढाबढमा बेचे
आफैं अगुवा भएपछि
हगुवा भनेर तिमीलाई बेचे
मलाई बेचे
प्रत्येक दिन हाम्रो श्वास बिक्री भइरहेछ
हाम्रो बास र आश बिक्री भइरहेछ
हामी बेचेर हात खाली हुँदा पनि
खुसी छौँ
हामी किनेर हात खाली हुँदा पनि
खुसी छौँ
हामीजस्ता ग्राहक पाएपछि
उनीहरूको तालुमा आलु फलेको छ
कमिसनको आकार बढेको छ
कात्रोमा गोजी थपेर
यमलोकको बाटो रोज्दै छन्
देश चुर्लुम्म डुबाएपछि
उनीहरू अहिले नारा लगाउँदै छन्
होस गुमाएछन् क्यारे
आफैंलाई कुरीकुरी भन्दैछन्
हामीजस्ता ग्वाँचे पाएपछि
हाम्रो सपना बेचेर
उनीहरू सत्ताको सातु मुक्याइरहेछन् ।

०००
सम्पर्कः- ९८४३०५४१६१