नेपाली हास्यव्यङ्ग्य अनलाइन पत्रिका

डा. बमबहादुर जिताली :

अदालतभन्दा माथि मन्त्रीहरू भए
त्यही पाटो पक्रिएर राष्ट्रपति गए ।
प्रभुलाई रिझाउँदा राष्ट्रहित बिर्से
व्यक्तिगत हित हेर्दा समस्या झन् सिर्जे ।

समुद्रमा पुग्ने बाटो सहमति थियो
सट्टापट्टा गर्ने कुरा हसाउने थियो ।
प्रभुलाई पठाएर नदी खोला छाँगा
उपहार ल्याएका छन् पन्ध्रओटा राँगा ।

सात सालदेखि चल्यो होडबाजी दिने
आफू मात्र मोटाउने आलुमूला किने ।
नागरिक अधिकार पनि बेची खाए
खान सक्ने टोली मिल्दा मोटो बिटो पाए ।

कोहीलाई मुन्ट्याएर ल्याएजस्तो गरे
गोही, सिंह, दुम्सी मिली मनपरी भरे ।
काण्डमाथि काण्ड भए सबै लुकी गए
भण्डाफोर भए पनि लुकाउने भए ।

श्रमजीवी नागरिक बेच्न लाए लाठे
भूमिलाई मरुभूमि पार्ने भए गाँठे !
देशीलाई परदेशी बनाउन आँटे
देश रितो बनाएर तार्ने भए गाँठे !!

०००
रानीबन, काठमाडौं