नेपाली हास्यव्यङ्ग्य अनलाइन पत्रिका

गायत्री परिराेशनी :

नयाँ फर्माइस केही छैन
पुरानै कुरा चाहियो हजुर ।
काम नगरी दाम चाहियो
भोक लाग्दा माम चाहियो ।

बेइमान छु, इज्जत चाहियो
बेकामी छु, पद र प्रतिष्ठा चाहियो ।
नैतिकता गुमाएको नेता हुँ हजुर
सके प्रधानमन्त्री नसके मन्त्री पद चाहियो ।

सबैले चाहेकै छन्,
सबैले पाएकै छन् ।
समाज असहिष्णु बनाउने
भँडुवा हुँ म तर,
समाजसेवीको पगरी चाहियो ।
विकृती र बिसंगतीको बुटी हुँ म
इमान्दार र नैतिकवानको पुरस्कार चाहियो ।
सबै कामकुरा गर्नलाई,
समाजले छुट दिएको मर्द हुँ म
गर्लफ्रेण्डसँगको रोमान्स देख्दा
रमाउन सक्ने श्रीमती चाहियो ।

चौबिसै घण्टा काम लाग्ने
सरकारी मान्छे हुँ म,
नहुने काम गर्नु छ भने
सि.सि. टि.भी. नभएको ठाउँमा
भित्र धेरै हात्ती भएको
निकै मोटो खाम चाहियो ।
आफू र आफ्नालाई
फाइदा र काइदा आउँछ भने,
जिउँदो लाश बन्न सक्ने,
नतमस्तक मान्छे हुँ म ,
सबैले गन्ने असल मानवको
अस्तित्व चाहियो ॥

०००
स्याङ्जा