आएछ यहाँ चाड तिहार
रमणीय चाड तिहार जान्नु ॥ शान्त खुशीको पर्व छ मान्नु । आनन्द लाग्छ चल्छ विहार । आएछ यहाँ चाड तिहार ॥
चूडा निर्भीक :
आकाश निलो सफा भएछ ।
बेला उत्तम हुँदै गएछ ॥
जानिन्छ शरद् सधैँ अपार ।
आएछ यहाँ चाड तिहार ॥
पुष्प बागमा फुल्छ प्रशस्त ।
वास्ना मीठो चल्छ समस्त ॥
फूलका याम लिई सवार ।
आएछ यहाँ चाड तिहार ॥
गाई र काग श्वान पुजिन्छ ।
प्राणीमै पनि मान बुझिन्छ ॥
होला भगिनी भातृ मिलाप ।
आएछ यहाँ चाड तिहार॥
चल्दछ भैली शहर र गाम ।
द्यौसीरे भन सुन्छ तमाम ॥
पाक्दछ रोटी सेल अचार ।
आएछ यहाँ चाड तिहार ॥
रमणीय चाड तिहार जान्नु ॥
शान्त खुशीको पर्व छ मान्नु ।
आनन्द लाग्छ चल्छ विहार ।
आएछ यहाँ चाड तिहार ॥
शुभकामना म दिन्छु विशेष ।
सम्पन्न बन्नु पर्दछ देश ॥
लक्ष्मी दिऊन् आशिष हार ।
आएछ यहाँ चाड तिहार ॥
०००
चन्द्रागिरी, काठमाडौं