नेपाली हास्यव्यङ्ग्य अनलाइन पत्रिका

चूडा निर्भीक :

बेचिन्छन् जनता उतातिर सधैँ मारिन्छ काटिन्छ रे ।
दुख्छन् ती जननी र बाबु जहिल्यै सम्झेर छोरा हरे ॥
भेटिन्नन् जब रोजगार सहजै खाडी विचार्छन् तर ।
तन्नेरी वय सिद्धिदैछ यसरी कल्ले दया गर्छ र ??

के हामी अभिशाप हौँ मुलुकका भन्दै गए लस्कर ।
गर्छन् मोज यहीँ मुसुण्ड ननिका गुण्डा तथा तस्कर ॥
लागेका परदेशतर्फ जति छन् बाँच्छन् उतै दुःखले ।
केही देह समाप्त हुन्छ पर नै सास्ती र संकष्टले ॥

विक्री मानिस गर्दछन् पद लिने आक्रान्त साधारण ।
रेटिन्छन् गतिला युवा मुलुकका हाम्रा विना कारण ॥
पार्ने क्लान्त र प्रान्त प्रान्त मतिका नेता हुँदा कारक ।
बिग्रेको छ सुयोग्य भूमि जहिल्यै छन् तुच्छ सञ्चालक ॥

आमाकै जब रक्त चुस्न कसिए छोरा र छोरीहरू ।
के ठान्छिन् जननी रुँदै दमित भै फाल्छिन् सबै आबरु ॥
मन्त्री सांसद हो गर्‍यौ कुन कुरा राम्रा तथा लायक ।
ठान्दैछौ कसरी मियो भन तिमी धिक्कार छौ नायक ॥

बेच्ने कार्य तुरुन्त बन्द गरियोस् आक्रान्त कोही नहोस् ।
गर्ने काम बुझाइदे युवकको यो देश भित्रै रहोस् ॥
फल्नेछन् जब कर्म यो मुलुकमा बन्नेछ माटो उँचो ।
गर्दैनौ शुभलो स्वदेश हितको फालिन्छ खोजी कुचो ॥

०००
सिम्पानी गोरखा
हालः चन्द्रागिरि, काठमाडाैं