नेपाली हास्यव्यङ्ग्य अनलाइन पत्रिका

चूडा निर्भीक :

बिगारेर माटो लगे नर्क हाले ।
लिँदै स्वाद सत्ता र भत्ता मजाले ॥
धरा माथि जाँदैन आफैँ गनाए ॥
प्रजात्नत्र खेल्ने भकुण्डो बनाए ॥

हिजो फाल्दथे स्वार्थ राखेर नारा ।
जहीँ देखिँदैछन् तगारै तगारा ॥
नबन्ने भयो यो मिलाएर खाए ।
युवाशक्तिलाई भकुण्डो बनाए ॥

छिमेकी उचाल्दै लिए दाम भत्ता ।
सबै श्रोत खाओ पुगौँ हाँक्न सत्ता ॥
गरे राष्ट्रको घात पैसा कमाए ।
खुशी राष्ट्र लाग्थ्यो भकुण्डो बनाए ॥

भने लोकवादी तथा साम्यवादी ।
गरे भोग यो देश सग्लो नराखी ॥
बने खात मन्त्री मिले भाग लाए ।
भए सात टुक्रा भकुण्डो बनाए ॥

लगातार पालो गरी हात पारे ।
कुनै साथ नारे कुनैको पछारे ॥
दिने साथ राम्रो भनी गीत गाए ।
नमिल्ने विचारी भकुण्डो बनाए ॥

०००
गोरखा ।