नेपाली हास्यव्यङ्ग्य अनलाइन पत्रिका

चूडा निर्भीक :

सत्तामा पुग्न जानेछ भोट माग्ने निरन्तर ।
सिन्को भाँचिन्न माटामा बन्छ आफैँ धनी तर ॥

नेता सांसदका हूल छन् सिंहदरबारमा ।
काम के हो यहाँ गर्ने हामी छौँ मझधारमा ॥

प्रदेशमा बसी लुट्छन् दलका खल बेसरी ।
भन्ने हावा चलेको छ जान्ने को हो कठैवरी ॥

हत्या हिंसा भएकै छ नारी माथि अझै पनि ।
सयौँ सर्कार के काम जनता गर्छ सोधनी ॥

तन्नेरी बलिया बेच्ने कार्य रोकिन्न धाउँछन् ।
होनहार युवा बेच्दा मन्त्री पैसा कमाउँछन् ॥

देखैकै हो हिजो मात्र भुटानी यसकै भयौँ ।
यो नागरिकता फाली शरणार्थी बनी गयौँ ॥

छन् विदेशिने भन्दै बस्ने लाईन लस्कर ।
यताचाहिँ रमाएका गुण्डा गर्ने र तस्कर ॥

झण्डा दलको बोक्छ झोले विद्वत बन्दछ ।
नेताका पछि लागेर हिँड्नेको घर चल्दछ ॥

ठेकेदार भए मन्त्री सुन ओसार्छ सांसद ।
कुस्ती प्रदेशमै खेल्छन् भोट खाने सभासद ॥

के बन्ला राष्ट्र नेपाल पत्रु चुनावमा उठे ।
लाखौँ धन खर्चेर खाए करोडमा लुटे ॥

वडा सदस्यका जत्था उपमेयर मेयर ।
खाने चुस्ने हसुर्ने छन् सत्ता हाँक्ने कलेवर ॥

शुकेनास भई गल्ने जनता भनिने भुरा ।
यतै रुन्छन् उतै रुन्छन् माग हुन्नन् कतै पुरा ॥

०००
काठमाडौं