नेपाली हास्यव्यङ्ग्य अनलाइन पत्रिका

डा. बमबहादुर थापा ‘जिताली’ :

सलह र चमेराले खाम खाएका छन्
सबैजसो नेपालीले काम पाएका छन् ।
खामभित्र खचाखच लुटेको छनोट
मिसन छ चौरासीको नोट फल्ने बोट ॥

जनताले काम पाए मोबाइलबाट
मोबाइल चलाउने छैनन् हरिटाट ।
सरकारले रोजगार दिन-दिनै दिन्छ
करमाथि कर पनि लिनसम्म लिन्छ ॥

मोबाइल पाएपछि केटाकेटी दङ्ग
नपाएमा सबै कुरा पार्छन् भताभुङ्ग ।
युवक र युवती छन् त्यसैमाथि व्यस्त
कामधन्दा पढाइ छ सबै अस्तव्यस्त ॥

बुढाबुढी पनि उही भजनमा मस्त
सम्पूणर्मा ध्वस्त छैन, विकासमा अस्त ।
हातहरू खाली छैनन् औंला चलेका छन्
कल्ले भन्छ अन्नबाली, अम्बा फलेका छन् ॥

फेसबुक पढीकन कुक बनेपछि
कुकरको दालभात भएको छ मसी ।
रोजगारी पाएका छन् भुलेका छन् जन
गर्नु छैन मुलुकमा मुक्ति-आन्दोलन ॥

चमत्कारी फेसबुक देखियो ।
रोजगारी हातैमा भेटियो ॥

०००
नागार्जुन न.पा.-१, रानीवन, काठमाडौं
९८४१४९१०८१