नेपाली हास्यव्यङ्ग्य अनलाइन पत्रिका

धनराज गिरी :

हात्तीको भर हुन्छ बाघ नभए गैंडाहरू तानिने
लेखा कागजको हुनेछ भवमा साथी यही छानिने
तोकेमा सरकारले यति भनी मान्ने भए लोकले
आफ्नै हो नगदे सखा कटकटे बैकुण्ठको तोकले

लक्ष्मीकान्त बने कुबेर पुजिने सम्मान होला बढी
जम्मा हाटक धेर नाटक हुने जोडिन्छ आई घडी
मोतीराम बनेर लेख कविता हीरा धरी साथमा
चाँदीको कटनी कमाल सटनी सत्ता हुने हातमा

लक्ष्मी खास सरस्वती भगवती वागीशजी आडमा
खोज्ने खास रमा सबै मनुजले सब्जी दही माडमा
अर्थोष्मा सबथोक भो अवनिमा सारा अडे वित्तमा
हो पाउण्ड टका सखा डलर भो हीरा गढे चित्तमा

अग्ला वास भए निकेतन खडा चर्चा हुने कारको
सत्तासाथ रहे बहे पवनझैँ आफन्त संसारको
दानी खास बने भने सकलले राधेयजी धीरजी
धीरोदात्त उदात्त खीर गुलियो श्रीरामजी वीरजी !

कोही टाट भए गयो विरहमा सन्तापको धूनमा
होला शोक अशोक हुन्न बरिलै बौलाउने जूनमा
पैसाको सब खेल भो चकचकी पैसा भए मानियो
पैसा ईश्वर राम कृष्ण हरिजी लक्ष्मी सबै जानियो !!

०००
चितवन