नेपाली हास्यव्यङ्ग्य अनलाइन पत्रिका

नदी भट्टराई :

जर्मनीका पिता साम्यवादी धिए
आज सारा जरा विश्वमा फैलिए ।
सर्वहारा मरे देश सम्पन्न छन्
‘पुत्र मार्क्सको हुँ मै’ सारथी भन्दछन् ।।१।।

मृत्यु छैनन् यहाँ लासका खात छन्
भोक छैनन् यहाँ भातका मात छन् ।
द्वन्द्व छैनन् यहाँ बुद्धमा घात छन्
‘पुत्र मार्क्सको हुँ मै ‘ सारथी भन्दछन् ।।२।।

नेतृ छन् रामझैँ बाहिरी रूपमा
रम्दछन् स्वार्थको फोहरी कूपमा ।
देवता भेषमा चोकमा चोर छन्
‘पुत्र मार्क्सको हुँ मै’ सारथी भन्दछन् ।।३।।

स्वाँठको गोठमा स्यालको राज भो
गाउँमा भक्त छन् बाघको हाँक भो ।
नीतिमा स्वर्ण रे ! व्यक्ति सामन्त छन्
‘पुत्र मार्क्सको हुँ मै’ सारथी भन्दछन् ।।४।।

ढाकियो अस्मिता झूटको वस्त्रले
लाजको टोकरी टन्न भो कर्मले ।
रक्त आफ्ना सबै अन्यका धर्म छन्
‘पुत्र मार्क्सको हुँ मै’ सारथी भन्दछन् ।।५।।

लुट्न सक्दा यहीँ स्वर्गको बास छ
मार्न सक्दा यहीँ जेलको नास छ ।
शक्तिमा भक्तिका ताजका जीत छन्
‘पुत्र मार्क्सको हुँ मै’ सारथी भन्दछन् ।। ६।।

आसुरी बाँसुरी वाद्यको जात छ
कुण्डले मण्डले साधुको रात छ ।
अल्झिएनन् कतै कामिनी साथ छन्
‘पुत्र मार्क्सको हुँ मै’ सारथी भन्दछन् ।।७।।

०००
सूर्योदय नगरपालिका, फिक्कल इलाम