नेपाली हास्यव्यङ्ग्य अनलाइन पत्रिका

सुभाषचन्द्र देवकोटा :

ज्यू हजुर ! गर्न गइएन !
लठैत भएर
कसैको टाउको फोरिएन !
अर्काको भाग खोसेर
आफ्नो भकारी पनि भरिएन !
दुःखै गर्न,
बरू खाडी मुलुक धाइयो
पसिना चुहाइयो !
भन साथी
म के वादी ?

परिवर्तनको लागि भनेर
धेरै पटक,
आन्दोलनमा लागियो,
मण्डलेहरुको लाठी खाइयो,
जेल नेलको यतना भोगियो,
देश भन्दा ठूलो ज्यान भनिएन
भन साथी
म के वादी ?

विवेक वन्दगी राखिएन
कसैको झोले बनिएन
कालोलाई कालै भनियो
नेताको भक्ति गाइएन
इमानको खाइयो
बेइमानको संगत गरिएन !
भन साथी
म के वादी ?

कोही नेतावादी
कोही झोलावादी
कोही के वादी, कोही के वादी
भन साथी
म के वादी ?

०००
काठमाडौं