नेपाली हास्यव्यङ्ग्य अनलाइन पत्रिका

रामशरण न्यौपाने :

सारा जान्दछ लोक देश कसले खायो उडायो कति
बोल्दैनन् तर मौन छन् नर सबै पारे नि खर्बौँ खती
जेथा यो बन जन्तुले मृग सरी खेद्दै लघारेर खा
मर्दा न्याय पचेछ अर्ब घुसको खुट्टा पसारेर खा ॥१

भोका निर्धनका लुटेर पसिना त्यो गाँस बासै पनि
आफैँ मात्र भुँडी भरेर सहसा अत्यन्त घाती बनी
पाकेका जति छन् मिठा फलहरू छानेर झारेर खा
मर्दा न्याय पचेछ अर्ब घुसको खुट्टा पसारेर खा ॥२

सारा काम भयो मिलीभगतमा सामन्तको आडमा
नेपाली जनको चढेर शिरमा हानेर झन् ढाडमा
भारी हिँस्रक जन्तुले शव सरी एक्लै घसारेर खा
मर्दा न्याय पचेछ अर्ब घुसको खुट्टा पसारेर खा ॥३

लेखा छैन विदेश देश भरि नै छन् बैँक खाताहरू
जग्गा औ घर छन् अनेकतिरका भित्रीलगानी अरु
छोडी गाउँ बजार झन् पर बसी एकान्त पारेर खा
मर्दा न्याय पचेछ अर्ब घुसको खुट्टा पसारेर खा ॥४

आगो शोषणको बल्यो मुलुकमा धेरै परे मारमा
सारा व्यक्ति विदेश खेदिन पुगे पारेर संहारमा
लैनो देश बकेर्नु आज दरियो दोएर दारेर खा
मर्दा न्याय पचेछ अर्ब घुसको खुट्टा पसारेर खा ॥५

०००
भक्तपुर